Gesa de la Barona
|
Quest articol chì l'è scrivud in lombard, con la Noeuva Ortografia Lombarda |
La Gesa de la Barona a l'è la parochiala pussee antiga de la Barona, dedicada ai sant Nazar e Cels.
Storia
[Modifega | modifica 'l sorgent]Per el Ceser Cantù una gesa lilnscì la gh'era di prim agn del cristianesim, ma quella de incoeu a l'è tirada a man del secol XIV, 'me una geseta che la catava dent quei che viveven in quella banda de campagna e che la partegniva ai benedetin del monester de San Cels, che gh'hann dad el nom. Del secol XVI la passa sota la giurisdizzion de San Lorenz, desgià che el monester l'haveva serrad su: el va inanz inscì fina al 1567 quand che i paisan, vegnud su de numer, gh'hann domandad al Carlo Borromee de fài parochia e lu i ha contentad, a dàgh un curad in pianta stabel. Del 1592 a l'è restruturada del tut e del 1845 a l'è fada su vuna noeuva, inscì de podé tegnì denter tucc i fedei.
Per via del gran territori che la quatava gh'era varie gese sussidiarie, che inn stade tute desconsacrade e doperade per alter reson sota el Napoleon, foeura che per la gesa de San March.
Del 1980 a l'è trad sgiò tut el presbiteri per adatàll ai disposizzion del Concili Vatican II.
Architetura
[Modifega | modifica 'l sorgent]Denanz a la gesa a gh'è un segrad cont i preje. De foeura la gesa a l'è in stil neoclassegh, ma a l'è stada minga fornida: la gh'haveva de vesser compagna de la Gesa de San Silvester al Ronchet. Gh'è un campanin de circa 50 meter.
A cros grega, dent a l'è domà a una navada con do capelle a lat, vuna la gh'ha dent el batisteri. Gh'è un orghen e varie piture religiose.