Gesa de Santa Maria a la Scala (Milan)

Quest articol chì l'è scrivud in lombard, con la Noeuva Ortografia Lombarda

La gesa de Santa Maria a la Scala a l'era una gesa de Milan che l'è stada trada sgiò del secol XVIII per fà spazzi al noeuv teater che 'l gh'haveva de sostituì el Teater Regio Ducal, che l'era brusad in d'un incendi.

Storia

Gesa gotega, l'era stada volsuda de la Regina de la Scala, mier del Bernabò Vescont, che gh'ha dad el nom, insì de sostituì una gesa dedicada a la Veronica, destrugada in la guerra in tra i Torrian e i Vescont del 1311. El 7 de setember 1381 el vescov Antoni de Saluzz el met sgiò la prima preja e l'è fornida poch inanz, con la consacrazzion del 1385.

In principi l'era ciamada Santa Maria ai Cà Rot, poeu Santa Maria Noeuva e, infin, Santa Maria a la Scala, in onor de la fondadora. Del 1384, quand che la moeur la Regina de la Scala, el marid el volza su la gesa e la fa collegiada de patronad signoril, cont un capitol de vint canonegh cont el titol de cler de cort, cont el compit de orà per i sciori milanes, viv e mort.

La resta importanta sota i Sforza ma la taca a perder rilev cont el Carlo V d'Asborgh che, in del viver foeura Milan, la deciara comunque Imperiale Saccellum e ghe lassa i privilegi, ma senza l'importanza che la gh'haveva prima. Sota el Felip IV, del 1654, l'è deciarada soa capella real e, donca, l'è fada gesa palatina.

Sota i austriegh se ved la soa fin: la Maria Teresa la reforma el capitol del 1763, che l'è trasferid in la Gesa de San Fedee, e infin l'è tirada sgiò del 1776 per fà su el noeuv teater, che 'l sarà ciamad in onor de quella gesa chi: tute i oeuvere importante inn portade in San Fedee, menter la campana la sona anca incoeu in del ciocher de Castelviscont.

Bibliografia

Maria Teresa Fiorio, Chiesa di Santa Maria alla Scala, in Chiese di Milano, Milano, Electa, 2006, ISBN 88-370-3763-5.
AS MI, Amministrazione del Fondo di religione, b. 446, fasc. Soppressione e ripristino del capitolo di Santa Maria della Scala, 1798 - 1800

Alter proget

Wikimedia Commons el gh'ha dent imagin o alter archivi su Gesa de Santa Maria a la Scala (Milan)