Regina de la Scala

De Wikipedia
Lumbard ucidental Quest articol chì l'è scrivuu in lombard, grafia milanesa.
Lee e 'l Bernabò

La Beatris Regina de la Scala (Verona, 1335 - Sant Angiol Lodesan, 18 de giugn 1384) a l'è stada la miee del Bernabò Vescont e donca co-sciora consorta de Milan insemma a la Gigliola Gonzaga (miee del Mattee II, finna al 1355) e a la Bianca de Savoja (miee del Galeazz II) e, dal 1378 al 1384, unega co-sciora consorta.

Biografia[Modifega | modifica 'l sorgent]

Fioeula del Mastin de la Scala, i sò fredej han tucc governaa Verona o Vicenza. El 27 de settember 1350 la se marida col Bernabò e la va a viv a la Cà di Can. Insemma gh'han avuu quindes fioeu, cinch mas'c e des tosann.

Politega dotada de granda abilità, l'ha juttaa el marii a ottegnì di prestit e di noeuv territori. El marii gh'ha daa on mugg de feud e la ministrazion de Regg de Lombardia.

L'ha faa fà su la Gesa de Santa Maria de la Scala, sbattuda poeu giò per fà su el Teater omonem, e l'ha trasformaa el Castell de Sant Angiol Lodesan in la soa dimora.

La moeur in del 1384 e 'l marii l'ha ordenaa ai milanes de portà el lutt per du agn. El primm fioeu, March, che 'l gh'eva de eredità el governo milanes, a l'era mort du agn prima.

Riferiment[Modifega | modifica 'l sorgent]