Gesa de Sant Ambroeus de la Vitoria
|
Quest articol chì l'è scrivud in lombard, con la Noeuva Ortografia Lombarda |
La gesa de Sant Ambroeus de la Vitoria a l'è una gesa de Parabiaa del secol XIV, fada su per volontà del Luchin Vescont che, in del mez de la bataja de Parabiaa, l'havaria ricevud un miracol del Sant Ambroeus, e l'è fornid del 1348, cont el Giovann Vescont che gh'ha mitud la prima preja.
Al temp, el dì de la bataja squasi tucc i nobil de Milan faseven una procession e l'era gestida de pret nomnad del comun de Milan, del 1481 per una petizzion de quei de la cità a l'è dada in gestion ai fradei ambrosian de la Gesa de San Barnaba e del 1647, dopo di alter lomentazzion, el Consili di LX decurion la dà ai cistercens, che la ciapen domà del 1668.
Del 1624 la gesa originala a l'è trada sgiò, perchè el costava trop restruturàlla, e in tra el 1708 e 'l 1713 a l'è fornida la gesa che la gh'è incoeu, cont anca tacad un monasteri. A l'è desconsacrad sota el Napoleon e 'l diventarà poeu 'n oeuvera pia per i fiolin pussee gram, e del 1913 l'è deciarada monument nazzional. Del 1932 a l'è crompada de la sanità per fànn una sed destacada del Manicomi de Mombell, per deventà poeu sed destacada de l'ASL: incoeu i sociazzion locai lavoren per el so restaver.
Bibliografia
[Modifega | modifica 'l sorgent]- "La Chiesa e l'Abbazia Cistercense di S. Ambrogio della Vittoria in Parabiago", Alessandro Giulini - 1923, Archivio Storico Lombardo, pagina 144
Alter proget
[Modifega | modifica 'l sorgent]
Wikimedia Commons el gh'ha dent imagin o alter archivi su Gesa de Sant Ambroeus de la Vitoria
