Gaitan Strambi
El Gaitan Strambi (italian: Gaetano Strambio; Cislagh, 1752 - Milan, 3 de magg 1831) a l'è staa 'n medegh lombard, zittadin austriegh, famos per el sò contribut, in l'Ospedaa Maggior de Milan, ai studi in su la pellagra.
Biografia[Modifega | modifica 'l sorgent]
El nass a Cislagh de pader dottor e 'l fa i studi classich a Lugan e 'l scomincia la carrera de prevet a Milan, che lassa in del 1779 per maridàss cont la compaesana Caterina Rimoldi. El se iscriv donca a medesina a l'Università de Pavia e 'l fa el medegh condott in tra Comm e Vares per on quaj ann.
I studi in su la pellagra[Modifega | modifica 'l sorgent]
In del 1784 l'Imperator d'Austria Isepp II d'Asborgh el fa dervì, a Legnan, on zenter per studià ona malattia assee spantegada in di contad lombard, ossia la pellagra. A 32 agn, raccomandaa del rettor de Pavia, a l'è nominaa direttor del center, che l'ha permittuu al Strambi de studià la malattia e de deventànn vun di espert pussee important al mond. El resta direttor finna al 1788.
El riva a capì che a l'è minga contagiosa ma dovuda a di carenz in del mangià, anca se poeu el falla in del pensà che la sibia ereditaria.
A l'Ospedaa Maggior[Modifega | modifica 'l sorgent]
In del 1789 el Governator de Milan el sara el center, ma l'Ospedaa Maggior el derva on sò repart per la cura de la pellagra, e 'l ciama el Strambi per guidàll.
In del 1797 a l'è faa medegh ordinari e in del 1810 a l'è nominaa direttor, roeul che 'l gh'ha per 6 agn.
Malaa de coeur, el va in pension in del 1816.
Mort[Modifega | modifica 'l sorgent]
El moeur in del 1831 a 79 agn, l'ha passaa i ultim agn de la soa vita a denonzià el stat de salut carent di por e di contaditt, situazion che la mena a la pellagra, e l'ha domandaa a la nobiltà e al cler de interessàss pussee a lor.
Incoeu el gh'ha dedicaa 'na via a Milan, in la Città Studi, e a Cislagh.
Pubblicazion[Modifega | modifica 'l sorgent]
- De Pellagra Caietani Strambio M.D. observationes, 1786
- De Pellagra annus secundus, 1787
- De Pellagra annus tertius, 1789
Riferiment[Modifega | modifica 'l sorgent]
Alter progett[Modifega | modifica 'l sorgent]
Wikimedia Commons el gh'ha dent imagin o alter archivi su Gaitan Strambi
