Ex Cementifix Italcementi (Alzan)

De Wikipedia
Sata a-a navegassion Sata a-a serchia
Lombard Occidental Quell articol qì l'è scrivud in Lombard, ortografia SL.
Vesta da nord del compless

L'ex Cementifix Italcementi de Alzan (ciamad anc Cementifix Fradei Pesenti)[1] l'è una vegia fabrica de cement natural de la fin del XIX secol. L'è un monument de arqeolojia industriala.[2]

Storia[Modifega | mudìfica 'l sorgènt]

Ind el 1883 l'è tornad a Alzan, dopo ol so studiar in Jermania, l'injegner Cesare Pesenti, qe l'istess ann l'ha inviad la costruzion del compless, part del so piano per spander e modernizar l'azienda de fameia. I è stait insé costruids i prim ses foren.

Ol lœg cernid l'è mìa casual: l'è vexin ai olter sit de la cadena de produziun, a la roja Morlana (qe la dava l'enerjia idraulega per i molin per la macinazion), a la nœva linia ferroviaria de la Vall Seriana (dervida ind el 1884) e ai cave de estrazion.

A la fin del secol i è realizads di foren verticai de brevet tedesc, qe i ha permetid la produzion del prim portland tœt lombard, e ol compless l'è stait slargad.

Ind el 1904 ol vegg foren vulcan l'è stait botad jo per costruir i prim quater foren Dietzsch sistema Pesenti, qe i permet de dovrar adoma una ciminiera ogne do foren, cond un grand risparmiar de carbon. I ne sarà jontad olter vot (con quater ciminiere) ind el 1909. Ind el 1920 i è tirads vià i foren tedesc e i è mœcade i so ciminiere.

Coi ang i comença i prim problemi a la strutura, e ind el 1959 i ciminiere del 1909 i è sbassade e rinforzade con di armadure de metall. Cinq agn dopo (1966) i è smorzads i foren per la cotura, e la resterà adoma la macinazion fina al 1971, ann de la serada definitiva.

Ol 25 de otover del 1980 ol Minister di Beni Culturai a Ambientai, Soprintendenza de la Lombardia, l'ha metid ol vincol a la fabrica come bene de interess artisteg e storeg.[3]

Galleria[Modifega | mudìfica 'l sorgènt]

Olter projets[Modifega | mudìfica 'l sorgènt]

Riferiments[Modifega | mudìfica 'l sorgènt]

  1. (IT) Cementificio fratelli Pesenti - Archeologia industriale
  2. (IT) Il monumento di archeologia industriale dell'Ex Cementificio Italcementi - Comune di Alzano Lombardo
  3. (IT) Projet per restaurar ol cementifix (2013)

Bibliografia[Modifega | mudìfica 'l sorgènt]

  • (IT) Camillo Bertocchi, Alzano Lombardo - Cementificio Italcementi - I Pesenti, l'edificio e il territorio