Culusses Capitel Düü

Quel articul chì l'è scrivüü in Lumbard, cun l'urtugrafia insübrica ünificada.

Culusses

La Parola de'l nost Signur ciapada inscí cuma l'è de'l Növ Testament e vultada adess del test uriginal grech in del nost parlà Insübregh del didincö.

Capitel Düü

¹Già che a vöri che vialter savii quant grand un cumbatiment che gh'huu per vialter e per lur che hinn a Laodicea e tücc che hann minga vedüü la mia fàcia in de la carna, ²perchè sien incuragiaa i lur cör, degià che hinn ünii insèma in del bén e a tüta la richéza de la piena certéza de l'inteligénza per la cugnussénza del misteri de Diu, Crist, ³in del qual hinn tücc i tesor scundüü de la saviéza e cugnussénza. ⁴Mì disi chèst, perchè nissün el v'imbröja cunt i argümént cunvincént. ⁵Già che se anca in de la carna sun assént, in del spirit sun cun vialter, intanta che gh'huu letizia e vedi la vostra orden e la saldéza de la vostra féd in de Crist.
⁶Dunca, cumè avii ricevüü Crist Gesü 'l Signúr, caminee in de lü, ⁷già che sii staa radisaa e faa sü in de lü e cunfermaa in de la féd propi cumè sii staa insegnaa, bundand in de lü in de la gratitüdin. ⁸Vardee che nissün de vialter sarà purtaa via per mèzz di filosofi e di vöj falsitaa segund la tradiziún di vèss üman e segund i prenzipi del mund e no segund Crist: ⁹perchè tüta la pienéza de la divinitaa la sta de cà in del sò corp, ¹⁰e vialter sii staa faa perfètt in de lü, che l'è 'l cuu d'ogni pudè e d'ogni auturitaa. ¹¹In del qual anca sii staa circuncis cun una circuncisiún fada no cunt i man in del sbiutà del corp de la carna, in de la circuncisiún de Crist, ¹²suteraa cun lü in del batesim, in del qual anca sii staa levaa sü insèma per mèzz de l'opera de Diu che gh'ha levaa sü di mort; ¹³e vialter, intanta che sii staa mort in di trasgressiún e in de l'incircuncisiún de la vostra carna, Lü 'l v'ha faa viv insèma cun lü, despö che 'l m'ha perdunaa tücc i pecaa. ¹⁴L'ha scassaa 'l ducümént di cumandamént cuntra de nümm che l'era nemís a nümm, e 'l gh'ha tolt del mèzz e 'l gh'ha inciudaa a la crus; ¹⁵despö che l'ha sbiutaa ogni pudè e ogni auturitaa, l'ha faa un esempi de lur püblegamént, despö che l'ha triunfaa sü de lur in de lü.
¹⁶Dunca, nissün de vialter giüdegarìa no in del mangià né in del bév né in di part d'una fèsta o d'una növa lüna o di sabèt; ¹⁷coss che hinn un'umbrìa di coss che hinn dree a vegnì, e 'l corp de Crist. ¹⁸Nissün decidarìa cumè arbiter cuntra vialter, vurend vèss in de l'ümiltaa e la religiún di angiul, i quij l'ha vedüü andand denter, sgunfiaa vanamént de la ment de la sua carna, ¹⁹e cuntruland no el cuu, del qual tütt el corp l'è furnii travèrs i giünt e i legamm e l'è ünii insèma e 'l cress el cressimént de Diu.
²⁰Se avii mort cun Crist a i prenzipi del mund, perchè, cumè stii de cà in del mund, ve sutaponii a urdinamént? ²¹Tuca no, e sagia no, e manegia no, ²²i quij hinn tücc a la destrüziún a l'abüs, segund i cumandamént e i insegnamént di vèss üman, ²³i quij hinn una parola che gh'ha minga saviéza in de l'aduraziún e l'ümiltaa e l'austeritaa del corp, i gh'hann nissün valúr cuntra la sudisfaziún de la carna.

Navigaziun

• ← Indree a Capitel Vün
• Inanz a Capitel Trii →
• A l'indes