Culusses Capitel Vün

Quel articul chì l'è scrivüü in Lumbard, cun l'urtugrafia insübrica ünificada.

Culusses

La Parola de'l nost Signur ciapada inscí cuma l'è de'l Növ Testament e vultada adess del test uriginal grech in del nost parlà Insübregh del didincö.

Capitel Vün

¹Paül, un apostul del Signúr Crist Gesü per la vuluntaa de Diu, e Timute 'l fradèll, ²a i sant che hinn a Culusse e a i fradèj fedéj in de Crist: grazia a vialter e pas de Diu 'l noster Pader.
³Nümm semper dèmm grazi a Diu 'l Pader e al noster Signúr Gesü Crist quand pregum per vialter, ⁴perchè sentum de la vostra féd in de Crist Gesü e del bén che gh'avii per tücc i sant ⁵per via de la speranza che l'è reservaa per vialter in di cél, la qual avii sentii prima in de la parola de la veritaa del vangel ⁶che l'è arént a vialter, propi cumè anca in de tütt el mund el sta prudüsend frütt e cressend cumè anca in de vialter, fin del dì in del qual gh'avii sentii e recugnussüü la grazia de Diu in de la veritaa: ⁷propi cumè avii imparaa d'Epafra, el mè cumpagn d'opera predilètt, che l'è un minister fedél de Crist per nümm, ⁸che anca l'ha deciaraa a nümm el voster bén in del Spirit.
⁹Per chèst anca nümm, fin dal dì in del qua l'èmm sentii, cessum no de pregà per vialter e dumandà che siuv impienii de la cugnussénza de la sua vuluntaa in d'ogni saviéza e cumprensiún spiritüala, ¹⁰perchè avii caminaa degnamént del Signúr in d'ogni desidéri de piasè, purtand frütt in d'ogni bon'opera, e cressend in de la cunuscénza de Diu, ¹¹essend faa fort in d'ogni puténza, segund la forza de la sua gloria per ogni perseveranza e paziénza. Cun la letizia ¹²dand grazi al Pader che 'l v'ha faa assee d'avègh una part in de l'ereditaa di sant in de la lüs; ¹³lü che 'l m'ha liberaa de l'auturitaa del scür e 'l m'ha trasferii al règn del fiöö del sò bén, ¹⁴in del qual gh'èmm la redenziún, la remissiún di pecaa:
¹⁵lü che l'è l'imagen de Diu che l'è no visibil,
el generaa primm de tüta la creaziún,
¹⁶che in de lü l'era creaa tüsscoss
in di cél e sü la tèra
i coss visibil e i coss no visibil,
se i tronn se i dumini
se i prenzipi se i auturitaa;
tüsscoss hinn staa creaa per mèzz de lü e per lü;
¹⁷e lü l'è prima de tüsscoss
e tüsscoss hinn staa metüü insèma in de lü,
¹⁸e lü l'è la crapa del corp de la gésa;
che l'è 'l prenzipi,
el generaa primm di mort,
perchè lü sia devegnüü el primm in de tüsscoss,
¹⁹che in de lü l'ha ciapaa piasè de stà de cà tüta la pienéza
²⁰e per mèzz de lü recuncilià tüsscoss a lü, fasend la pas per mèzz del sangh de la sua crus, se i coss sü la tèra se i coss in di cél.
²¹Anca vialter una völta erii alienaa e nemís a la mént in di oper malign, ma adèss l'ha recunciliaa ²²in del corp de la sua carna travèrs la mort per presentàv sant, sénza smagia e ireprensibil denanz de Lü, ²³se cuntinüii in de la féd, stabilii, sald e no luntanaa de la speranza del vangel che avii sentii, che l'è staa pruclamaa a tüta la creaziún che l'è sura 'l cél, del qual mì, Paül, suu devegnüü un minister.
²⁴Adèss gh'huu letizia in di patimént per vialter e impieni i besogn di tribulaziún de Crist in de la mia carna travèrs el sò corp, che l'è la gésa, ²⁵de la qual sun devegnüü mì un minister segund l'aministraziún de Diu che l'è staa daa a mì per vialter, per cumpì la parola de Diu, ²⁶el misteri che l'è staa scundüü di secul e di generaziún--e adèss l'è staa faa ciar a i sò sant, ²⁷a i quij Diu l'ha vurüü fà vedüü chèll che l'è la richéza de la gloria del chèst misteri tra i naziún, che l'è Crist tra vialter la speranza de la gloria: ²⁸el qual nümm pruclamum intanta che amonum ogni persona e insegnum ogni persona in tüta la saviéza, per presentà ogni persona cumplètt in de Crist: ²⁹per el qual anca me sfadighi, cumbatend cun la sua forza che la laura in de mì cun puténza.

Navigaziun

• ← Indree a Filipes
• Inanz a Capitel Düü →
• A l'indes