Cors Venezzia (Milan)

Quest articol chì l'è scrivud in lombard, con la Noeuva Ortografia Lombarda

El Cors Venezzia a l'è un stradon central de Milan, che 'l conliga Piazza San Babila a Porta Venezzia. Vist 'me vun di sit pussee sciori e elegant de la cità, l'è part de quell che l'è ciamad el Quadrilater de la moda. El va poeu inanz in sul Cors Buenos Aires.

Un temp el serviva soratut a conligà Milan con Berghem, e donca Venezzia, e Monscia: quand che 'l Ferdinand, fioeul de la Maria Teresa d'Austria, el va a Milan 'me governador el fa fà pussee belle i mure spagnoeule del Giuseppe Piermarini e 'l met i giardin publegh, roba che la mena i sciori milanes a fà su i so palazzi in su la noeuva strada: inscì, la deventa el center de la soa vita social, inveci del Cors de Porta Romana.

In del cors se troeuven el Musee civegh de storia natural, el Planetari de Milan, el Palazz Saporiti, el Palazz Castion, la Cà Fontana-Silvestri, el vegg seminari, la Cà Barelli, la Cà De Maestri, la Torr Rasini, el Palazz Serbellon, la Cà Crespi e 'l palazz de la società Buonarroti-Carpaccio-Giotto.

L'è servid de la linia M1 del metrò, cont i stazzion de San Babila (metropolitana de Milan), Palestar e Porta Venezzia e de la stazzion de Porta Venezzia del passant ferroviari de Milan.