Cartoccia (informatega)

De Wikipedia
Jump to navigation Jump to search
Lumbard ucidental Quest articol chì l'è scrivuu in lombard, grafia milanesa.
Atari 2600 con cartoccia

La cartoccia (in ingles cartridge) a l'è 'na memoria che la se pò mett e cavà de 'n sistema che 'l consist in d'ona scheda elettronica che la se connett al sistema cont on connettor. A l'è tipicament doperada 'me memoria de massa, anca se di voeult la fonziona 'me memoria RAM.

L'ha avuu fort success in di primm console di videogioeugh, e l'ha tegnuu 'sto roeul finna a la nassita del support ottich e anca in di primm home computer, anca se l'era pussee doperaa el lettor di cassett magnetich. Incoeu resten in di console portatil 'me el Nintendo 3DS, la PlayStation Vita e 'l Nintendo Switch.

Diffusion[Modifega | mudìfica 'l sorgènt]

El sistema a l'era inizialment doperaa in sui console di agn '70, e l'è staa poeu confermaa in di console di agn '80 e '90 e cont i home computer di agn '80. Per i console, i pussee famos a hinn el NES e l'Atar 2600, l'ha avuu success finna ai agn '90, e cont i console portatil finna al di d'incoeu. Inveci per i console fiss la cartoccia a l'è stada poeu bandonada perchè tropp piscininna per i noeuv gioeugh. A bon cunt però i cà c'han tegnuu finna a l'ultim i cartocc, 'me la Nintendo che i ha bandonaa domà in del 2001 cont el GameCube, han avuu di vantagg in la reduzion de la pirateria.

I computer, inveci, han bandonaa i cartocc cont la fin de l'era a 8 bit e, di voeult, a 16 bit. Tucc i PC pussee famos, 'me el Commodore 64, el IBM PCjr, el Texas Instruments TI-99/4A, el Commodore 16, la familia Atari a 8 bit, el Sinclair ZX Spectrum e 'l Sinclair ZX80 e ZX81 gh'even el lettor di cartocc, anca se el dispositiv de elezion a l'era el lettor di cassett magnetich o, soratutt in America, el dischett.

Vantagg e svantagg[Modifega | mudìfica 'l sorgènt]

I vantagg principai de la cartoccia a hinn ligaa a la resistenza, pussee volta de quella de 'n disch ottich, e a la possibilità de doperàlla 'me memoria primària e indirizzàlla direttament, senza cobbiàlla in RAM.

Cont el cress de la dimension di videogioeugh a l'è però deventaa impossibil fà di cartocc a cost accettabil, e l'è staa preferii el disch ottich, e l'è stada preferida la capacità a la velocità. Per esempi, on CD el contegn pussee de 600 MB de dacc, la cartoccia pussee granda de la Nintendo 64 MB.

Giont ai sistema[Modifega | mudìfica 'l sorgènt]

I cartocc podeven giontà anca di fonzionalità ai sistema: Despess eren dotaa de 'na soa RAM o di sò chip per l'audio o per salvà i informazion del gioeugh, cont ona batteria tampon, o per avègh l'ora, tipich di gioeugh basaa in sul temp.

El primm gioeugh cont ona cartoccia inscì a l'éra The Legend of Zelda per NES, cont batteria tampon e RAM per el salvatagg.

Vos corelaa[Modifega | mudìfica 'l sorgènt]