Blu-ray
|
Quest articol chì l'è scrivud in lombard, con la Noeuva Ortografia Lombarda |
El Blu-ray a l'è un disch otegh per salvàgh sora di dacc pensad 'me evoluzzion del DVD per i video a Volta Definizzion, inscì de podé tegnì varie ore sora de video HD. Inscì de fàll, el dopera un laser in tra el bloeu e 'l violet, che ghe permet de havégh la trascia cont i pit e i land pussee strecc, donca el permet de havégh un disch de bas de 25 GB e, cont i sistema con du de de nivei, fina a 66 GB. El formad BDXL, con quater nivei, el permet de havégh disch de 100 GB per doperà comercial e fina a 128 GB se scrivud de l'utent.
Presentad in del 2006 de la Blu-ray Disc Association, l'ha batud l'HD DVD in d'una guerra de formad andada inanz fina al 2008, e 'l gh'ha havud 'me concorrenza pussee piscinina quella del VMD, che l'era un DVD con pussee de nivei dent che 'l podeva havégh denter fina a 20 GB. Sostegnud de la Sony, se pensa che 'l so roeull 'me media per i sgioeugh de la PlayStation 3 el gh'habia havud una gran importanza in del so sucess. L'è stad doperad poeu anca per la PlayStation 4 e la PlayStation 5 e per l'Xbox One e la Xbox Series X.
Formad de scerna per i media fisegh, de lu vegnen i formad Archival Disc, con disch de 100 GB, 300 GB e 1 TB pensad per l'archiviazzion a longh termen, e l'Ultra HD Blu-ray, che l'è pensad per el 4K, con disch de 50 GB, 66 GB e 100 GB. El po doperà i codec H.262/MPEG-2 Part 2, H.264/MPEG-4 AVC e VC-1 e 'l po havégh sora di video cont una resoluzzion de 1920 × 1080 pixel, con 24, 50 o 60 frame normai o 50 e 60 interlaciad, per paragon, un DVD el podeva havégh sora domà una resoluzzion de 480 linie televisive in NTSC e 576 in PAL.
Riferiment[Modifega | modifica 'l sorgent]
Alter proget[Modifega | modifica 'l sorgent]
Wikimedia Commons el gh'ha dent imagin o alter archivi su Blu-ray Disc
