Bartolomee Sachella

Quest articol chì l'è scrivud in lombard, con la Noeuva Ortografia Lombarda

	«A me pur conviene lacrimare mutando 'l parlare ambrosiano in foresto»
	(Frottole, 1440-1450 ca.)

El Bartolomee Sachella (italian Bartolomeo Sachella, scrivud anca Bartolomio; in latin Bartolomeus Sachella o de Sachellis; Milan, 1380 circa - dopo el 1450) a l'è stad un poeta milanes.

Biografia[Modifega | modifica 'l sorgent]

L'è nassud a Milan, d'una fameja milanesa (anca se forsi con di radis de la zona de Lissandria). Sò pader a l'era el Lantelmo, fioeul del Beltram di cont de San Peder. El gh'haveva duu fradei: el Lodovigh (che l'è poeu deventad un nodar) e l'Antoni.
L'ha ereditad del pader terre (centvintcinch perteghe de terra, metude a vin, arent a Cambiagh, oltra che di cà a Milan) e daner. Intorna al 1402 l'ha vivud a Cremona, probabilment esiliad dopo i facc de sangh che gh'era vegnud foeura in Milan dopo la mort de Gian Galeazz. In del 1410 l'è stad in preson a Tortona, forsi perchè l'era malvist del governator de Milan Facino Cane. A bon cunt sgiamò in del 1412 l'era tornad a Milan: el viveva in d'ona cà de fameja arent a la gesa del Pasqueroeul.
In del 1417 l'è stad cangeller de la Fabrica del Dom (sò pader l'era stad un deputad - compagn d'un consejer de aministrazzion del dì d'incoeu); ma in general a l'era inscì scior che l'ha podud dedicàss soratut a la poesia, tant l'è vera che 'l se presentava come frotulista mediolanesis (saress a dì "scritor milanes de frotole"). I sò frotole in soratut de argoment moral, ma g'hann denter anca di notizzie biografeghe. La pupart di frotole contegnude in del sò manoscrit a poden vesser datade in tra el 1440 e 'l 1450 (e soratut in del bienni 1446-1447), anca se ghe n'è 'na quaivuna ben pussee antiga (intorna al 1410).
Se sa minga de prezzis quand che l'è mort, ma el dovaria vesser stad dopo el 1450.

La lengua doperada[Modifega | modifica 'l sorgent]

Cressud in de l'ambient de la cort di Viscont, che per prim aveven portad a Milan autor e poeta toscan, anca el Sachella el proeuva a doperà una lengua "ilustra" per i sò frotole: de fat, el sò volgar el pò vesser considerad toscan, ancaben che l'è pien de lombardism, soratut lessicai.