Autostrada
L'autostrada a l'è ona strada fada per favorì i grand fluss de comunicazion veicolar a volta velocità. La prima autostrada al mond a l'è stada la Autostrada di Lagh, in Lombardia.
Ogni Stat el gh'ha i sò legg in materia, però tipicament in autostrada a gh'è la proibizion de circolazion a pedon e veicoli a bassa velocità, separazion in tra i carregiaa, che hinn a sens unich, e on numer de corsij volt, almen 2 o 3, anca se in d'on quaj territori remott el numer a l'è pussee bass.
Definizion
[Modifega | modifica 'l sorgent]Per la Convenzion de Vienna in sul Traffich Veicolar del 1968, ratificada de la pupart di Stat, on'autostrada a l'è ona strada fada per el traffich di auto, cont ona division in tra i carregiaa, senza incros a ras con alter strad, ferrovij o tramvij e segnalada come autostrada.
Tipicament i autostrad a hinn segnalaa cont el verd o cont el bloeu.
Limit de velocità
[Modifega | modifica 'l sorgent]
Ogni Stat el scerniss i sò limit de velocità in autostrada, tipicament a l'è intorna ai 100 km/h, o pocch pussee.
L'Italia, la Franza, la Danimarca, la Cechia, la Slovacchia, l'Ongheria e la Grecia i gh'ha on limit de 130 km/h.
Spagna, Portogall, Finlandia, Irlanda e Turchia i gh'ha on limit de 120 km/h.
In del Regn Unii el limit a l'è de 112 km/h, in Polonia e Bulgaria de 140 km/h, a Cipro e in del Montnegher de 100 km/h.
La pupart di alter Stat la gh'ha 110 km/h 'me limit, foeura di Autobahn todesch, senza limit generai, ma cont ona velocità massima consiliada de 130 km/h e di limit locai in cas de necessità o de conformazion particolara del territori.
Pagament
[Modifega | modifica 'l sorgent]
La pupart di autostrad a l'è a pagament, e gh'è pussee maner de pagàll.
On quaj Stat el gh'ha ona tariffa fissa per doperà i autostrad, e se dopera la vignetta autostradala per pagàlla: Per esempi in Ongheria e Svizzera a l'è inscì.
In d'on quaj alter el prezzi a l'è in bas al percors, e gh'è di casej per pagà el pedagg, a man o cont di sistema digitai: inscì a l'è per esempi in Italia.
Alter progett
[Modifega | modifica 'l sorgent]
Wikiquote el gh'ha dent citazzion de o su Autostrada
Wikimedia Commons el gh'ha dent imagin o alter archivi su Autostrada
