Antibioteg

Articol di 1000 che tucc i Wikipedie gh'hann de havégh
De Wikipedia
Lombard Quell articol qì l'è scrivud in Lombard, cond l'ortografia Scriver Lombard.

I antibioteg i è sostanze faite sœ de microrganism (soratœt mœfe), o faits sœ ind laboratore, qe i è bon de copar o far mocar de cresser di olter microrganism. Del pont de vista de l'ativitaa, i antibioteg i pœl hvir-ga una azion batericida quand qe i copa el microrganism patojen, 'me presempe le penicilline, o sedenò una azion bateriostatega quand qe i riva a blocar la riproduzion dei patojen, ma senza copar-i. Le droge antimicrobege, qe i è ona particolar tipolojia de qimioterapeg, i è caraterizade de una MIC (minema concentrazion inibenta), quand qe i è bateriostateg, o de una MBC (minema concentrazion batericida), quand qe i è batericids; qei du indegadur qé i è importants fess ind la pratega clinega per la decision del dosaj necessare.

Seletivitaa ind la tossicitaa[Modifega | modifica 'l sorgent]

Per i antibioteg l'è important fess el concet de tossicitaa seletiva, qe l'è la capacitaa de vesser tosseg domà invers i microrganism, e miga ind i confronts de le cellule eucariotege del om; perqè sœcedes qell lavor qé el bersai de l'antibioteg el pœl vesser esclosif o seletiv. Prexempe, vergun antibioteg el lavora ins vergun constituents presents ins la membrana cellulara dei procariota e miga presents ins qella dei eucariota; olter invece i lavora ins i ribosoma, presents in tœte e do le tipolojie cellulare ma de forme diferente: i procariota i g'ha i ribosoma 70S, e i eucariota 80S.

Resistenza a la qemioterapia antibiotega[Modifega | modifica 'l sorgent]

Vun dei problema plussee grands al dé d'incœ l'è qe i s'è formads batere resistents ai diferents antibioteg qe i g'è. I microrganism i sa difend de la droga grazie a mecanism de resistenza diferents, qe i porta a miga subesser i efets negativ del xenobioteg, grazia a la modificazion del bersai molecolar, a un aument del efluss de la droga o an'mo a la modifegazion de la so entrada ind la cellula. I è do le modalità de resistenza ai antibioteg plœ doprade:

  • Resistenza intrisega, o insesibilitaa primaria: quand qe un antibioteg el fonziona miga ins un determenad patojen perqè el batere el g'ha mia el bersai del antibioteg medem. Prexempe, un antibioteg qe el bloca la formazion de la pared cellulara el fonziona miga ins i batere qe i ge l'ha miga per natura;
  • Resistenza guadegnada o insensibilità segondaria: l'è la plœ importanta e preocupanta, e ge n'è do tipolojie:
    • Resistenza endojena o cromosomega: la se propaga de fœja vertegala intra la cellula mader e la cellula fiœla, la g'ha una bassa percentuala de insorjenza (la rapresenta domà el 10-15% de tœte le resistenze guadegnade) e la deriva de una mutazion spontanea de l'informazion jenetega cromosomega;
    • Resistenza esojena o extra-cromosomega: l'è a trasmission orizontala, e l'è la plœ preocupanta, come qe la representa el 90% de tœte le resistenze e la se jenera per aquisizion de una informazion jenetega nœva, a travers di mecanism de coniugazion, trasformazion e trasduzion. L'è la plœ brœta perqè la se propaga de fœja orizontala, donca anca a batere de specie diferente.

Prope perqè l'è una roba grama fess, ind i ultem agn l'è dré a far-s una campagna de educazion forta fortenta ind el usaj corret di antibioteg, incé de evitar qe sa desvelupes grœp de batere resistents.

Classifegazion dei antibioteg seconda el mecanism d'azion[Modifega | modifica 'l sorgent]

I antibioteg i se pœl classifegar ind tre insema, second el so mecanism d'azion:

  • Antibioteg qe i interferess cond la sintesis del peptidoglican;
  • Antibioteg qe i interferess cond la trascrizion;
  • Antibioteg qe i interferess cond la sintesis de le proteine.