Anna Politkovskaja

De Wikipedia
Jump to navigation Jump to search
Chest artícol a l'è scricc in Lumbàrt Orientàl, ortograféa unificàda Lombard oriental



Anna Stepanovna Politkovskaja (en rüso: Анна Степановна Политковская; Nöa York, 30 de óst del 1958 - Mósca, 7 de utùer del 2006) l'è stàda 'na giornalìsta rüsa e ativìsta per i derécc de l'òm cunusìda per la sò upuzisiù a la guèra 'n Cecénia e al presidènt de la Rüsia Vladimir Putin.[1]

La Politkovskaja la s'è fàda 'n nóm coi sò reportàge sùra la Cecénia, endóche divèrsi giornalìsti e lauradùr umanitàre i è stacc sequestràcc e facc fò. 'Na ólta pò a lé l'è stàda arestàda e pò fàda ogèt de na simulasiù de ezecusiù de la part dei militàr rüsi.

'N ótra ólta, endèl setèmber del 2004, quan che gh'ìa 'n bal la crìzi dei ostàgi de Beslan, entàt che l'ìa söl aparèchio per nà a Beslan, l'è stàda mal e la g'ha pirdìt conoscènsa. L'aparèchio el g'ha duzìt turnà 'ndré per dàga socórs. I dutùr i è mai stacc bù de spiegà 'l malùr ma 'n tacc i pènsa che la sàpe stàda 'nvelenàda, però lé l'è scampàda e l'è nàda 'n nacc a fà informasiù.

La g'ha scriìt divèrsi lìber, tat sùra la guèra 'n Cecénia come sùra la Rüsia de Putin e la g'ha risiìt divèrsi prémi 'ntenasiunài.

Ai 7 de utùer del 2006, Anna Politkovskaja la vé copàda 'ndèl ascensùr de la sò cà, entàt che l'ìa dré a rientrà. La sò mórt la g'ha mitìt en müimènt divèrse persùne e organizasiù en Rüsia e 'ndèl mónt, per fà sé che le circostànse de l'omicìdio le vignìes ciarìde prìma pusìbol.

Biografìa[Mudifega | mudìfica 'l sorgènt]

La Politkóvskaja l'è nasìda a New York endèl 1958 col nòm de Anna Mazepa, de genitùr de urìgin ucraìna che lauràa cóme diplomàtich a le Nasiù ünìde. L'è crisìda a Mósca e la g'ha stüdiàt giornalìsmo a l'Università Statal de Mósca, endóche la s'è laureàda endèl 1980. La g'ha dat la tézi sùra le poezìe de Marina Cvetaeva. La Politkovskaja la gh'ìa citadinànsa tàt dei Stàti Ünìcc che de la Federasiù Rüsa.[2]

Premi e ricunusimèncc[Mudifega | mudìfica 'l sorgènt]

Riferimèncc[Mudifega | mudìfica 'l sorgènt]

  1. World Politics Review LLC,Politkovskaya's Death, Other Killings, Raise Questions About Russian Democracy, 31 Oct 2006
  2. 'Independent journalism has been killed in Russia' Becky Smith