Amazonas

De Wikipedia
Lumbard ucidental Quest articol chì l'è scrivuu in lombard, grafia milanesa.

Amazonas (in portoghes [ɐ̃maˈzõnas]), nomm offizial Estado do Amazonas, l’è vuna di 27 unidàa federativ del Brasil, in de la Region Nord del paes. L’è el pussee grand intra i staa brasilian, cont on territori de 1.559.159,148 km2, pussee grand che la Francia, la Spagna, la Svezia e la Grecia insema, e 65 volt pussee grand de la Region Lombardia. El confina cont trè nazion - Perù, Colombia e Venezuela - e cinch alter staa brasilian - Roraima, Pará, Mato Grosso, Rondônia e Acre.

La pupart del staa (el 98%) l’è covert de la Foresta Amazzonega, che la ghe dà el nomm, e la sò popolazion l’è de domà 4 million de person, la metàa di quaj la viv in de la capital, Manaus, a la confluenza del Rio Negro cont el Rio di Amazzon. In di mont in del nord del staa, a la frontera cont el Venezuela, el se troeuva el Pico da Neblina, el mont pussee alt del Brasil.

Manaus, la capital.

Abitaa in epoca precolombiana de tant etnii indigen, el territori del staa de Amazonas d’incoeu l’è staa descovert di europee del 1541, quand i spagnoeu Gonzalo Pizarro e Francisco de Orellana hann traversaa i And e hinn viaggiaa per el Rio di Amazzon finn al sò delta in de l’Atlantegh.