Giuliano Pisapia

De Wikipedia
Lumbard ucidental Quest articol chì l'è scrivuu in lombard, grafia milanesa.
Giuliano Pisapia
Mansion Sindegh de Milan
Period Dal 30 magg del 2011
Predecessor Letizia Moratti


El Giulian Pisapia (Milan, 20 magg 1949) l'è on avocatt, scrittor e politegh italian, deputaa per duu legislatur (1996 e 2006). A partì del 30 de magg 2011 a l'è deventaa sindech de Milan.

Biografia[Modifega | modifica 'l sorgent]

A l'è fioeu, ultem de sett fradei, de mader milanesa e pader casertan[1]; chest ultem, Gian Domenico Pisapia, a l'è staa enter i autor del codes de procedura penala italian del 1989. Dopo avè frequentaa el Liceo classigh Giovanni Berchet de Milan, el s'è laureaa in giurisprudenza e in scienz politigh e l'ha toeu-sù el studi legal de sò pader. Inquand a l'era giovin, el lavorava, olter, comè volontari de la Cros Rossa Italiana pasmà el comitaa provincial milanes[2].

El fa part del Comitaa scientifigh de la Camera penala de Milan e del Comitaa direttiv di revist Critica del Diritto, Alternative Europa e I diritti dell'Uomo, oltra che component del consej d'amministrazion de la fondazion Vidas. El lavora comè giornalista publicista, e i sò articoj a hinn staa publegaa sora i pricipaj giornaj e periodech talian. Ha scrivuu vos sora enciclopedii giuridigh comè Digesto e Novissimo Digesto Italiano, in particolar sora i reaa contra la fameja.

El s'è ocupaa, enter i alter cas, de la difesa d'on quaj pastor e militant de Scientology in del primm process talian faa contra l'organizzazion[3], de chella de l'Abdullah Öcalan inquand a l'era in Italia, e a l'è staa el legal de la fameja del Carlo Giuliani (che la s'era costituida part civila in del process sora i fatt del G8 de Genova del 2001)[4]. Olter, a l'è staa avocatt de part civila de la CIR del Carl De Benedetti inquand a gh'era el process SME[5].

Depos ona convivenza de vint agn, el 9 de april 2011 el s'è sposaa, cont on rito civil, cont la giornalista Cinzia Sasso a Venezia, la cittaa de origen de la miee[6].

Attivitaa politega[Modifega | modifica 'l sorgent]

Quand l'era giovin, in di agn '70, Pisapia a l'era visin al moviment Democrazia Proletaria. In chest moviment chì, nassuu comè alleanza elettorala e poeu deventaa partii de estrema sinistra, anca present in del Parlament de la Republega Italiana intra el 1976 e 'l 1987, el Pisapia el lavora comè avocatt e 'l difendeva in tribunal i militan e i organizzazion sindacaj confederaj.

Deputaa[Modifega | modifica 'l sorgent]

In del 1996 l'è staa eleggiuu al Parlament (Camera di Deputaa), comè indipendent, in di list de Rifondazion Comunista. In la XIII legislatura l'è staa president de la Commission Giustizia de la Camera. In del 1998, contrari a la linea tegnuda del capp del sò partii (Fausto Bertinotti), l'ha votaa la fiducia al governo Prodi.
Pisapia l'è staa eleggiuu anca in la XIV legislatura (II e III governo Berluscon, 2001-2006), e anca in 'sto cas l'ha faa part de la Commission Giustizia de la Camera. In del 2006 el s'è minga candidaa, ma el vegn nominaa dal Ministeri de la Giustizzia president de la Commission de Studi per la Reforma del Codes Penal.

Sindech de Milan[Modifega | modifica 'l sorgent]

Campagna elettorala[Modifega | modifica 'l sorgent]

In del giugn 2010 a l'è 'l primm esponent del center-sinistra a candidàss ai primari per el sfidant de la Letizia Moratti per la cariga de sindech. L'intenzion a l'è stada ofizialiada cont on event al Teater Litta, che 'l seguitava on apell di intelletuaj e personagg de la scenna sociala e politega de la cittaa[7].

Festeggiament in piazza del Dòmm la nòcc del 30 de magg 2011, dopo l'elezion del Pisapia comè sindech de Milan.

I primari de la coalizion de center-sinistra per scernì el primm cittadin a s'hinn tegnuu el 14 de november 2010: Pisapia, sostegnuu a l'inizzi domà de SEL[8] e FdS, a l'è riessii a batt i alter sfidant, cioè l'architett Stefano Boeri (el candidaa del PD), el costituzionalista Valerio Onida e l'ambientalista Michele Sacerdoti, cont el 45% di preferenz[9].
Inscì a l'è cominciada la campagna elettorala de Pisapia, che l'ha vist per la prima volta del 1997 el centersinistra rivà al ballottagg a Milan (per de pù in vantagg de sett pont sora el candidaa del centerdestra). Al ballottagg del 29-30 magg 2011, Pisapia el vegn el sindech quell de cinquantasett de Milan, cont el 55,1% di vot contra el 44,9% de la Moratti[10][11].

Mandaa[Modifega | modifica 'l sorgent]

In tra i sò primm att a gh'è la revoca del PGT (Pian de Governa del Territori) aprovaa de la gionta precedenta, e inscì se promoeuven di lign noeuv per la politega urbanistega milanesa. Sotta la soa ministrazzion inoltra scomincen i lavorà per dò lign noeuv de la metropolitana. Pisapia inoltra el ghe da on gran spazzi a la quistion di "diritt civil": in del 2012, dopo 'na consoltazzion ben longa con la soa magioranza, el derviss el register di union civil. In del 2014 poeu el trascriv in sul register comunal i matrimoni de sett coppi de l'istess sess che s'eren sposaa foeura de l'Italia.
Sotta la soa ministrazzion se tegna l'Expo de Milan, e scomincen i lavorà per dò lign noeuv de la metropolitana milanesa.

El 22 de marz del 2015 l'ha nonziaa che 'l se saria minga candidaa per on segond mandaa[12].

Oper[Modifega | modifica 'l sorgent]

A l'è autor del volum:

  • Milano Città Aperta - Una nuova idea di politica, Milano, Rizzoli, 2015.

A l'è co-autor di volum:

  • San Vittore: voci dal carcere e sul carcere, Milano 1988;
  • Usage de stupéfiants: politiques européennes, Ginevra 1996;
  • Il Diritto e il Rovescio: i rapporti tra politica e magistratura;
  • Giustizia penale: esiste l'approdo?, 2007;
  • In attesa di Giustizia - dialogo sulle riforme possibili, 2010.

On sò sagg a l'è present dent el volum Legalizzare la droga. Una ragionevole proposta di sperimentazione (Feltrinelli, 1991).

A l'è autor de scritt e sagg de caratter giuridigh, social, dent el camp del diritt penal, di tematigh ligaa a la tossegodipendenza, del rappòrt enter carcer e societaa.

Nòt[Modifega | modifica 'l sorgent]

  1. Modell:Treccani
  2. Laura Guglielmi. Pisapia: «La Rotonda della Besana, le boccette sui Navigli e il caffè a letto». 6 dicembre 2012. URL consultad in data 29 gennaio 2013.
  3. «Scientology: Pisapia, sentenza Cassazione coraggiosa». Adnkronos, 24 ottobre 1997. Vardad in data 1º novembre 2012.
  4. G8, la Corte di Strasburgo assolve l'Italia per la morte di Carlo Giuliani. 24 marzo 2011. URL consultad in data 23 maggio 2011.
  5. Processo Sme. Cir-De Benedetti chiede un risarcimento record: 4,5 miliardi di euro. 6 giugno 2003. URL consultad in data 1º giugno 2011.
  6. Giuliano Pisapia e Cinzia Sasso: il "sì" a Venezia. 9 aprile 2011. URL consultad in data 30 maggio 2011.
  7. Elisabetta Soglio. «Centrosinistra, Pisapia si candida», 16 giugno 2010.
  8. Stefano Rossi. Primarie, Vendola lancia Pisapia. 7 novembre 2010. URL consultad in data 8 febbraio 2012.
  9. Teresa Monestiroli. «Primarie a Milano, Pisapia batte Boeri - "Ho fatto un miracolo, adesso un altro"», 14 novembre 2010. Vardad in data 23 maggio 2011.
  10. Elezioni comunali del 29 e 30 maggio 2011 - II turno - Comune: Milano. 30 maggio 2011. URL consultad in data 6 giugno 2011.
  11. «Cori da stadio in Duomo per Pisapia, e lui: «Sarò sindaco di tutta Milano»», 30 maggio 2011. Vardad in data 30 maggio 2011.
  12. «Giuliano Pisapia: “Nel 2016 non sarò candidato a sindaco di Milano”», 22 marzo 2015. Vardad in data 7 aprile 2016.

Vos ligaa[Modifega | modifica 'l sorgent]

Ligamm de foeura[Modifega | modifica 'l sorgent]