Dialett triestin

Quest articol chì l'è scritt in milanes, ortografia classega.

El dialett triestin (triestin) l'è on dialett de la lingoa veneta che l'è parlaa a Triest.
L'è on dialett recent, perchè fina al XVIII secol a Triest se parlava el tergestin, dialett pusee simel al Ladin e al Forlan. El vènet l'era parlaa domà foeura de la citaa (e famos hinn el Bisiach e'l Grades). Poeu la citaa l'è finida sòta l'Imperi Austriach, che l'ha renduda on pòrt liber. L'è donca diventaa on loeugh assee ricch, e on grand numer de abitant del Vènet hinn rivaa per trovàgh fortuna.
Questa migrazion l'ha portaa a la nassida a Triest de on dialett simel a quij del vènet, menter el tergestin l'è finii in disus.
Poeu, cont el passà del temp, anca el triestin l'ha ciappaa dij differenz del vènet standard. A esempi, el gh'è on gran numer de paròll de origin s'ciava, greca, forlana o todesca (ma la magior part dij paròll l'è neolatina e vèneta).

Traj dialett derivaa del triestin el gh'è quèll de Gorizia e la lingoa franca che doperen i sloven de la Provincia de Triest per parlà con i personn de nazionalitaa italiana.

Cià chì el Pader Nòster in Triestin:

Pare nostro che te son nei celi
che sia benedido el tuo nome
che vegni el tuo regno
sia fata la tua volontà
come in cel cussì in tera
dane ogi el nostro pan cuotidian
e rimetine i nostri debiti
come noi ghe li rimetemo ai nostri debitori
e no indurne in tentazion
ma liberine dal mal.
Amen