Wikipedia:Cinqu pilaster
Tutt i regol de Wikipedia se basen su cinqu pilaster che definissen i sò carateristich. Se pò dì che wikipedia la gh'ha minga regol fiss, foeura che quij cinch pilaster chì.
 |
Wikipedia l'è on'enciclopedia che la gh'ha dent tucc i element tipich di alter enciclopedij "generich", di enciclopedij "specialistich" e di almanacch. Wikipedia l'è minga ona collezion indiscriminada de informazion. Donca, l'è minga ona font primaria, ma domà secondaria; l'è nò on dizionari e nanca on palch per fa comizzi, e nanca on giornal; Wikipedia l'e minga el pòst per fà reclam, oppur on banch per provà l'anarchia o la democrazia; l'è nanca ona web directory, oppur on sitt per scriv i opinion, esperienz o argumentazion; tucc i contributor deven sforzàss de andà dree a i politigh basaa su la verificabilità e su la proibizion de ricerch originaj. |
 |
Wikipedia la gh'ha on pont da vista neutral: el voeur dì che quand se scriv o se modifica ona vos se pò minga esprimm domà on pont de vista. Bisogna riportà tutt i different teorii a propòsit de l'argoment trattaa in de la vos, e gh'è de trattai in manera ciara, imparziala e cont tutt i font (sicur), de manera che quij che leggen capissen e pòden, se voeuren, controllà. Su Wikipedia gh'è minga on pont de vista miglior o peggior di alter, e gh'è minga la veritaa rivelada. Quand se comincia a bozzà a propòsit de ona vos, se dev bloccà la vos, desmett de bozzà e rivà a on compromess in de la pagina de discussion de la vos. |
 |
Wikipedia l'è libera, e donca el so contegnuu l'è modificabil liberament. Tucc i test vegnen rilassaa sòta licenza libera GFDL e pòden vess citaa, distribuii, modificaa, venduu anca del primm che passa. Gh'è nò di vos de proprietaa, e se pò no pretend che i alter faghen minga modificazion a ona vos. Libera el voeur dì anca che l'è vietaa mett dent material quattaa de copyright oppur conceduu cont ona licenza che la va contra la GFDL. |
 |
Wikipedia la gh'ha on còdes de comportament, e donca bisogna rispettà i utent anca se semm minga d'accòrd con lor. I utent de Wikipedia gh'hann de comportàss civilment, senza fà attacch personaj o edit war e, per fàla curta, senza fà el pirla. Boeugna vess in bona fed e, almanch finn a quand che l'è possibil, presumìla in di alter utent. |
 |
Wikipedia la gh'ha minga di regol fiss, foeura che quij cinch regolett chì. Avii minga pagura de fà i modifich, perchè l'è minga necessari vess perfett. Stii sicur che tutt i vecc version de ona vos vegnen salvaa, e l'è semper possibil andà a ripescàj; l'è anca possibil cattà ona veggia version de ona vos giamò scancellada. Considera anca, a l'istessa manera, che se te scrivet ona baggianada, el database la tegnarà bonna in di agn a vegnì; Wikipedia l'è trasparent, e la gh'ha la memòria longa. |