Utent:Sciking/Sandbox/Batalion Santa Maria
El Batalion Santa Maria o anca Compagna de polizzia Santa Maria (in ucrain Рота поліції «Свята Марія») a l'è stada una milizzia cristiana ucraina volontaria che, in tra el 2014 e 'l 2016, l'ha combatud i separatista pro-russ in la guerra del Donbass.
Storia[Modifega | modifica 'l sorgent]
L'è stada fada su del moviment nazzionalista e anarchegh Fradellanza in principi 'me part del Batalion Azov e ciamada Compagnia de Gesù Crist: la va dent poeu al Batalion Šachtars'k e, quand che l'è desligad, a l'è slargada, mituda denter di rangh del Ministeri di Afar Interni e de la Polizzia Nazzional poeu, e la toeu part a la bataja de Mariupol' del 2014 'me part de la forza militar de la cità, e la va inanz a fà la gafa in di bande strategiche de Mariupol' anca inanz.
La formazzion l'era ispirada ai Taleban, inscì l'ha did el Čornly, vun di fondador del corp, che l'ha did che eren dree a fà su i Taleban cristian e che la soa forza e ideologia l'era la fed. El so fondador principal a l'è stad el Dmytro Korchynsky, parlamentar elesgiud a la Rada Suprema cont el Partid Radical de Oleh Ljaško e che per quella reson chi l'ha lassad la guida pratega de la milizzia: l'è stad lu, del 2016, a nonzià el desligament del batalion, un poo perchè ghe rivaven pu i omen per tegnìll pizz, un poo perchè quei che gh'eren voleven combater e fà minga i polee.