Trii Principi del Popol

De Wikipedia
Lombard Quest articol chì l'è scrivud in lombard, con la Noeuva Ortografia Lombarda
Cartell con scrivud "I trii principi del popol unissen la China" in su l'isola Dadan, controllada de la Republega de China, vers la China continental

I Trii Principi del Popol (三民主義, Sān Mín Zhǔyì in chines) a inn un insema de penser politegh desvilupad del Sun Yat-Sen inscì de fà de la China un pajes liber, scior e potent, teoria mituda a la bas de la Republega de China, che incoeu la controlla Taiwan, e del Kuomintang.

A inn Mínzú, de solet voltad 'me nazzionalism, de intender 'me union de tucc i popoi de la China - representad di color de la bandera original de la Republega - al net de l'etnia, inscì de restà liber del domini forester, Mínquán, de solet voltad 'me democrazzia ma de intender pussee 'me "governo del popol", ispirad a quell ocidental ma con vari element ciapad de la coltura chinesa, de realizàss a travers de elezzion, votazzion de revoca, inizziativa e referendum e Mínshēng, de solet voltad 'me "governo per el popol", o ben el stà ben del popol, vist de tancc 'me una critega sia ai ecess del socialism che del capitalism senza regolle, anca a travers di tasse de spirit georgista.

Desgià che 'l Sun l'è mort prima de definìj ben, el terz principi l'ha s'cepad i relazzion in tra el Kuomintang e 'l Partid Comunista Chines, desgià che i prim, sota la guida del Chiang Kai-shek, l'hann vist pussee 'me una forma de socialdemocrazzia indova che 'l Stat el garantiss a tucc di dirit, menter che i segond, guidad del Mao Zedong, l'hann inveci vist 'me forma de sostegn al comunism o, comunque, che rivàgh di Trii Principi a l'è no evitabel.

Riferiment[Modifega | modifica 'l sorgent]

Alter proget[Modifega | modifica 'l sorgent]

Vos corelade[Modifega | modifica 'l sorgent]