Trebonian Gall

De Wikipedia
Lumbard ucidental Quest articol chì l'è scrivuu in lombard, grafia milanesa.
Statoa del Trebonian Gall

El Cai Vibi Trebonian Gall, mej conossuu domà 'me Trebonian Gall (Caius Vibius Trebonianus Gallus in Latin; Perugia, 206 - Terni, agost 253) l'è staa on imperador roman del 251 al 253 insema al fioeu Volusian.

Come tanti alter imperador del period de la crisi del III secol, l'ha provaa senza tropp success a mett a post i robb che andaven maa in de l'Impero Roman (i invasion barbarigh, l'economia, l'anarchia militar), ma la soa mort violenta l'ha interott el sò lavorà. De fatt el sò motto a l'era Pax æterna.

Biografia[Modifega | modifica 'l sorgent]

La famiglia[Modifega | modifica 'l sorgent]

L'è nassuu a Perugia de ona famiglia de rango senatorial che forsi l'era de origin etrusca: i Vibii.
L'ha sposaa ona certa Afinia Gemina Bebiana e 'l gh'ha avuu duu fioeu: el Volusian e la Vibia Galla.

La carrera[Modifega | modifica 'l sorgent]

L'ha faa i robb che faseven tucc i omen de bona famiglia romana. In del 250 l'è staa consol (insema al Volusian), poeu l'è staa mandaa in de la Mesia de Sotta, incarigh che 'l fa vedè quanta l'era la stima che l'imperador Decio el gh'aveva per lù. Duranta 'sto period el s'è comportaa ben e 'l s'è faa vorè ben di sò soldaa.

Imperador[Modifega | modifica 'l sorgent]

In del 251, i imperador Decio ed Erenni Etrusch hinn mort in de la battaglia de Abrittus, longh el Danubi. El Trebonian Gall l'è staa proclamaa imperador di sò soldaa in sul camp de battaglia. Per quest a gh'è chi che dis che lù el sia rivaa tardi apposta per fà morì el Decio, o che in ogni cas el fuss d'accordi coi Gott in d'on quai moeud.

Ma appena vegnuu imperador, el gh'ha avuu de stringg coi Gott ona pas molto dura, vist che i Barbar hann poduu tegnìss i danee e i presonee che aveven ciappaa duranta i sò incursion (come quella de Filippopol) e gh'aveven el diritt de avèggh ona certa quantità d'or ogni ann.

Poeu el Trebonian l'è tornaa a Roma, indove se trovaven anmò el segond fioeu del Decio, Ostilian (tropp giovin per andà in battaglia col sò pà), e la soa mader, Erennia Cupressenia Priscilla.

El Trebonian Gall l'ha scernii de adottà l'Ostilian e fàll vegnì co-imperador, menter el sò fioeu natural l'è staa nominaa ceser.

Politiga interna[Modifega | modifica 'l sorgent]

Al temp, a Roma la gh'era la peste: trai mort el gh'è staa anca l'Ostilian. Allora el Trebonian l'ha elevaa al rango de imperador el sò fioeu.

Denanz a l'emergenza de la peste 'l Trebonian l'è staa molto decis: l'ha faa sì che tucc i mort tropp pover per avèggh on funeral fussen aiuttaa del Statt. In 'sto moeud l'ha ciappaa el favor del popol. Ma per el rest l'è minga riessii tant a fà i robb che 'l voreva. Per esempi, l'è minga riessii a fermà i incursion di Gott a Pessinunt e a Efes in del 252/253.

I font cristiann disen che 'l Trebonian l'ha faa di persecuzion, compagn del sò predecessor. I alter font però cunten sù domà che l'imperador l'ha miss in preson el soll papa Corneli.

Politiga esterna[Modifega | modifica 'l sorgent]

A orient inveci i Persian del re Savor I hann battuu i roman in la Battaglia de Barbalissos e hann invaduu la pupart de la provincia de la Siria. In del 253 inoltra hinn riessii a conquistà anca Antiochia. Ma malgraa tutt, el Trebonian Gall l'ha minga organizzaa di controffensiv.

In sul confin danubian el noeuv governador de la Mesia de Sotta, Emilian, l'ha voruu minga pagà el tribud ai Gott: i German hann passaa el fiumm ma hinn staa battuu. I soldaa allora hann nominaa l'Emilian imperador.

La fin[Modifega | modifica 'l sorgent]

L'Emilian l'ha ciappaa sù i sò soldaa e l'è partii per l'Italia, per batt el Trebonian Gall. Quest chì el s'è movuu col sò fioeu e i sò armad per fermàll. Intrattanta el gh'ha domandaa al governador de la Rezia, el Valerian, de rivà in Italia per dàggh ona man.

Proppi per spettà i rinforz, i duu imperador s'hinn movuu adasi. Ad agost eren rivaa domà a Terni, indove l'è stada fada la battaglia. Chì l'Emilian l'ha vingiuu e 'l Trebonian Gall e 'l Volusian hinn scappaa via. Ma i sò guardi j'hann mazzaa arent a Narni. Lù el gh'aveva quarantasett ann e l'aveva regnaa domà per duu.

Ironia de la sort, on para de mes dopo l'Emilian l'ha faa l'istessa fin e 'l Valerian, finalment rivaa in Italia, l'è diventaa imperador.

Bibliografia[Modifega | modifica 'l sorgent]

Vos correlaa[Modifega | modifica 'l sorgent]