Tit Capitel Vün

Quel articul chì l'è scrivüü in Lumbard, cun l'urtugrafia insübrica ünificada.

Tít

La Parola de'l nost Signur ciapada inscí cuma l'è de'l Növ Testament e vultada adess del test uriginal grech in del nost parlà Insübregh del didincö.

Capitel Vün

¹Paül, un sèrv de Diu, e apostul de Gesü Crist segund el féd di scernii e la cugnussénza de la veritaa che l'è segund la pietaa ²sü la speranza de la vita etèrna che Diu, che 'l büsarda no, l'ha prumèss prima de tütt el témp, ³e l'ha faa savüü al sò propi témp la sua parola in d'una pruclamaziún, che 'l m'è staa fidaa segund el cumand del noster Salvadúr Diu, ⁴a Tít, el mè vér fiöö segund la féd cumüna: grazia e pas de Diu, noster Pader, e Gesü Crist, el noster Salvadúr.
⁵Per via de chèst t'huu lassaa in de la Creta, perchè te metet in d'orden i coss che resten e te numinet anziann in d'ogni citaa, cumè t'huu cumandaa, ⁶se quajdün l'è ireprensibil, un omm de vöna miee, gh'ha bagaj fedèj, no in d'acüsa de trasada o l'è no sutamèss. ⁷Già che l'è necessari che 'l vescuv el sia ireprensibil cumè un manegiún de Diu, no arugant, no svèlt a l'ira, no ciuch, no pügnaz, no ravàs de danee, ⁸ma 'l vör bén i furestee e chèll che l'è bun, muderaa, giüst, sant, e 'l se cuntrola, ⁹el ten sald a la parola fedéla segund l'insegnamént, perchè 'l sia capaz anca d'esurtà in de la dutrina che l'è san e de cunvinc quij che cuntradisen.
¹⁰Già che tant personn hinn no sutamèss, parladúr di coss inütil e imbrujadúr, spezialamént quij de la circuncisiún, ¹¹l'è necessari sarà i lur bucch, lur che stravachen cà intregh insegnand coss che hinn no necessari per via de guadagn desunést. ¹²Quajdún de lur, el lur propi prufèta, l'ha dii:
«I Cretés hinn semper busard, bestì cativ, stumegh che fann nagott»;
¹³Chèsta testimunianza l'è vera, per via de la qual resún el i remena severamént, perchè sien san in de la féd, ¹⁴e che dann minga atenziún a panzanégh giüdee e cumandamént di vèss üman che giren via de la veritaa. ¹⁵Tüsscoss hinn pür a i pür, ma a i tacugnaa a quij che creden no, nagott l'è pür, ma sia la lur ménte che la lur cusciènza hinn tacugnaa. ¹⁶Fann prufessiún de cugnúss Diu, ma neghen cunt i oper, già che hinn detestabil, desübediént e inütil d'ogni opera bona.

Navigaziun

• ← Indree a Segunda Timotee Capitel Quater
• Inanz a Capitel Düü →
• A l'indes