Terdobbi
El Terdobbi (localment [tar'dubi]; italian: Terdoppio) l'è on riaa piemontes e lombard.
A l'è longh 86 chilometer, e 'l sò percors l'è staa s'ceppaa in duu tocch: el primm, ciamaa noares, el ghe va dent al Tesin, intant che 'l segond (el lumellin) el ghe va dent al Pò. I duu tocch on temp eren taccaa insemma, ma in del Medioev el cors de quell noares l'è staa desviaa per portàggh l'aqua ai ronsg de la Bassa.
El percors[Modifega | modifica 'l sorgent]
Noares[Modifega | modifica 'l sorgent]
El Terdobbi el nass in di bricch del Noares, in tra i comun de Graa e Dumian. El scorr invers al sud, in parallel a la Gogna, a ovest de la vall del Tesin. El passa arent a Noara, al sò confin sud-est. Rivaa in tra Trecaa e Sozzagh, el scomincia a spartiss in vari brocch: vun el ghe va dent a la Ronsgia Scerana; on olter el va drizz fina a Sceran, e lì el finiss denter a la Ronsgia Mora. L'ultem tocch el va drizz fina a Cassoeu, e lì el finiss denter al Tesin.
Lumellin[Modifega | modifica 'l sorgent]
El nass a Sozzagh de l'union de vari ronsg e risorgiv, cont el nomm de Fregg (prononzia local: [frøtʃ]). El riva in Lombardia aproeuv a Gravellona, e lì el cambia el nomm in Terdobbi. De lì el traversa tutt la Lumellina, e 'l ghe passa denter ai comun de Vigeven, Gambolò, Trumell, Garlasch, Dorn, Zinasch. Rivaa a Somm, el va a finì denter al Pò.
Curiosità[Modifega | modifica 'l sorgent]
El Terdobbi el ghe da el nomm al comun noares de Terdobiaa, anca se al dì d'incoeu le traversa pu.