Strabon

De Wikipedia
Sata a-a navegassion Sata a-a serchia
Lombard Quell articol qì l'è scrivud in Lombard, cond l'ortografia Scriver Lombard.
Ol Strabon

Ol Strabon (Latin : Strabo ; Greg : Strábōn) a l'era un jeograf e scritor greg nassud a Amasia a metaa del secol I A.C. e mort vers l'ann 20 D.C.

Al dessendeva per part de la soa mader d'una fameia grega notabila, ind la qual al figurava ol so grand-pader Moaferne. Al studia a Nisia da Caria indov al g'ha per maestr ol retoreg e gramateg Aristotel, ol filosof peripateteg Xenarc de Seleucia, e ol Tiranio. Al completa la soa istruzion cont dei viaj long per la Gregia, l'Italia e l'Ejit e al cognoss dei oltr lœg per dei relata de viajador de la soa epoca. Cont i so esperienze e i relata compilade, al scriv una "Jeografia" (Geographica) dividuda in 17 liber, prategament tuts conservads. Ind i so descrizion al da preferenza a'l clima, produzion, moralitaa, us, costum, relijon, istituzion, e al cita frequentament i greg Iparc, Eratostenes, Polibi e Omer, e ol roman Juli Cesar per la descrizion dei Gallie.

Ol Strabon al pœ tœvr i so dats sora l'Hispania Citerior del Marc Vespasian Agripa (+ 12 A.C.), qe comè comandant de la flota romana a l'heva partecipad ai guerre cantaber, e anca del storeg greg Timagenes, nassud a Alexandria e trasferid a Roma ol 55 A.C. (in principi comè prexoner de guerra ; pœ liberad, al derv una scœla de retorega).