Sistema live
|
Quest articol chì l'è scrivud in lombard, con la Noeuva Ortografia Lombarda |
Un sistema live (ciamad anca Live CD) a l'è, in informatega, un sistema operativ che l'è bon de fonzionà anca se l'è minga installad in del disch dur de 'n computer.
Tradizzionalment, a l'era eseguid de 'n CD, de chi el nom, ma in di darrer temp ghe n'è che fonzionen de DVD e de ciav USB, ma in passad ghe n'era anca in sui dischet. A bon cunt, per un frach de temp in di prim agn del personal computer, l'hard disk a l'era una roba pussee e 'l sistema principal a l'era caregad in su 'n dischet.
El termen donca a l'è vegnud foeura cont el spantegàss di sistema installad in su 'n drive interno e di CD, che hann permetud de havégh sistema che vann de 'na memoria esterna.
I prim cognossud inn stad FM Towns OS e VSM Desktop del 1989, menter el prim cognossud per Linux a l'è stad Yggdrasil Linux in del 1992, ma el prim che 'l gh'ha havud debon sucess a l'è stad Knoppix, vegnuda foeura in del 2003.
Al dì d'incoeu anca di sistema comerciai compagn del Windows gh'hann di so version live, tant 'me Windows To Go.
Propi perchè tochen minga el sistema che l'è installad el po vesser doperad per provà un alter sistema operativ, per fà di robe con la garanzia de havégh un sistema operativ segur e net o anca per recuverà di dacc de un sistema con di problema o fà di indagin forense.
In general, i sistema live inn de domà letura, e donca l'è mia possibel modifegài: a l'è però possibel doperà di tecneghe de persistenza, soratut in su i ciav USB, indova che se lassa una part del spazzi per i dacc de l'utent e, con di file system trasparent, mudà anca i file de sistema che, però, resten anca in version original.