«Hoo fad quell che m'hann did de fà, a la manera pussee bona che hoo podud. Se nissun l'havaria fad inscì, la ghe saria stada pu la Finlandia»
(Resposta quand che gh'hann domandad se 'l provava no di remors per tucc quei che l'ha copad)
El Simo Häyhä
El Simo Häyhä (Rautjärvi, 17 de dicember 1905 – Hamina, 1 de avril 2002) a l'è stad un militar finlandes, regordad per la soa atività 'me cechin per l'Armada finlandesa in la guerra d'invern, contra l'Armada rossa. Inscì brao de havé copad almen 542 soldad sovietegh, con di stime che riven fina a 800, a l'era donca ciamad la mort bianca (Белая cмерть, Belaya smert in russ, Valkoinen kuolema in finlandes), l'è recognossud 'me el cechin pussee mortal de la storia, cont el so fidad Mosin-Nagant de la Guardia Civega, che 'l gh'haveva del so temp de volontari.
Deventad obietiv primari di russ per quella reson chi, l'è stad cercad anca de l'artilieria, e l'è colpid de 'n soldad sovietegh el 6 de marz del 1940, cont una balla che ghe s'cepa la mandibola e ghe lassa una deformazzion per tuta la vita. Lassad squasi mort e mitud in d'una pila de corp, l'è recuverad de 'n camarada che l'ha did che ghe calava mità facia.
El s'è dessedad el 13 de marz, dì de la pas, e 'l gh'ha mitud quatordes mes per tornà in pè, con 26 cerusie. L'ha volud toeu part a la Guerra de continuazzion, ma l'hann fad minga andà dent a l'armada per via del so dann al vis. El s'è mai maridad e l'ha vivud dopo la guerra 'me allevator de can e caciator, lontan de la società, vist che gh'haveven fad anca di menasce de morte per tut quei che l'haveva copad, e l'è semper stad modest, a parlà no di so merit e a dì che l'era inscì brao domà perchè l'haveva fad pratega. L'ha passad i so ultim agn in d'un ospizzi per veteran de guerra, indova che l'è mort a 96 agn.
Wikimedia Commons el gh'ha dent imagin o alter archivi su Simo Häyhä