Scuma
La scuma (olter variant: s'ciuma, spiuma) a l'è ona dispersion de gas in d'on mez liqued, soled o gel. In del primm cas la se ciama scuma liqueda, in del segond inveci scuma soleda. In d'on quai cas i scumm a gh'hann anca di dispersion coloidai.
A poeudom vedè i scumm ben despess in de la natura: de norma vegnen foeura per via de 'na dispersion mecanega de la fas gassosa in d'ona fas condensada. On esempi a l'è quell di ond del mar: el sò moto l'è bon de tirà denter a l'aqua on bell poo de volumm de aria, e inscì la vegna foeura la scuma de la cresta de l'onda.
I scumm poeuden vess prodott anca de l'industria, e gh'hann usagg diferent (per esempi in de la cosmesi, ma anca per la nettadura).
Certi scumm inveci a hinn on sotta-prodott minga voruu de la produzzion industrial, soratutt in del cas de vari process biochimegh (tant 'me in de l'industria alimentar).
El nomm[Modifega | modifica 'l sorgent]
El termen scuma (e i sò variant) riven del longobard skūm, messedaa con la parolla s'cetta latina, che l'è "spuma"[1]. A l'è doperaa in tanti olter lengov romanz, comè 'l catalan (escuma) e l'italian (schiuma).