Scarena

Quel articul chì l'è scrivüü in Lumbard, cun l'urtugrafia insübrica ünificada.

El nücli principal de la gesa de Sant'Ana

Scarena (Scarenna) a l'è una frazion del cumün cumasch de Ass, in de la Valassina. La pò vess cunsiderada la zona residenziala del cumün, per i svilüp ürbanistigh di ültim deseni.
La gesa paruchiala de Sant'Ana in Angereta l'è multu antiga e l'è stada fada in de la gera del fiüm Lamber, che al dì d'incö el scur püssee luntan ma che al temp l'aveva pruvucaa di inundaziun.
Scarena l'ha faa part de la piev milanesa de la Valassina e dunca l'è stada un cumün autonum per un poo de temp.

Rob da vedè

El pont de la Fola

Tur Palavisin

La Tur di Palavisin de Scarena l'è stada fada sü in del 1140 e la resist anmò adess, anca se cun vari mudifigh rispet a la custrüziun uriginala.

Pont de la Fola

Quel punt chì (in Italian Ponte della Folla) a l'è un pont in sül Lamber che 'l culegava Ass a Scarena. In del 1999, in ucasiun del gemelagg de Ass cunt el cumün frances de Saint-Péray, el pont l'è staa restaüraa e gh'è staa proibii ai machinn de passàgh sura. El trafich de fat adess el passa lungh el pont növ, sitüaa a una quai desena de meter püssee a val. In mezz al pont növ la gh'è una targa scrivüda in Latin, Italian e Lumbard.

• Test in Latin: Pontem, nomine dictum Folam, obsoletum parumque idoneum substituendum, una cum Lariana Tricuspidata Montana Communitas, et Assiensis civitas, pro meliore ad Vallassinam aditu alterum ex novo confici voluerunt. Ad perpetuam rei memoriam tertio millennio adveniente. A.D. MIM.
• Test in Italian: Per liberare dalle fatiche il nostro vecchio ponte della Folla, il comune di Asso e la Comunità Montana del Triangolo Lariano vollero questo nuovo ponte della Vallassina, migliore entrata e transito a tutta la valle. A memoria perenne per il terzo millennio, 1999.
• Test in Lumbard: Per regurdà per semper l'inaugurazión del punt da la Valassina, faa fà da la Comunità Muntana di düü ramm del lach e dal cumün de Ass, al post del punt vècc "de la Fola", per favurì el pasàcc vers tuta la Valasina. 1999.

L'Ultulina

In del december del 1888 a l'è stada fundada ad Ass la sucietà di fradei Ultulina, che l'ha segnaa el passagg a l'era indüstriala. La fabriga de cutun la funziona anca al dì d'incö e l'è sitüada arent al pont de la Fola.
La fabriga di Ultulina l'ha salvaa l'ecunumia del paes in d'un periud de puvertà granda in tüta la Lumbardia e in tüta l'Italia.