Sasser
|
Quest articol chì l'è scrivud in lombard, con la Noeuva Ortografia Lombarda |
El Sasser (prononzia milanesa [sa'se:]; in italian: Roggia Boniforti o Boniforte) l'è ona ronsgeta che la fa de scolmador del Navili Grand.
El nass a Milan, squas a la fin del percors del Navili prima de andà dent a la Darsena: pu o manch arent al pont de preda che gh'è denanz a la gesa de la Riva. Lainscì, l'aqua la ven scolmada con di ciuse, e la passa sota terra fina a la via Argelati, dove che la sponta foeura per ona centena de meter. In la via Argelati, storegament, la ronsgia la vegneva doperada di lavandere per netà i pagn, e di bagaj che ghe faseven el bagn d'estad.
Dopo vesser passad per la via Argelati, el Sasser el torna anmò sota terra arent a piazza Arcole e poeu ancamò in superfis in del parch Segantini. Dopo de lì, el finiss anmò 'na voeulta sota terra: el riva fina a Moncuch e lilinscì el finiss denter al Lambret.
A partì di Agn Novanta e fina al 2017, el Sasser l'era stad desvoidad e denter gh'era pu de aqua.