Gesa de la Riva
La Gesa de la Riva (italian: Chiesa di Santa Maria delle Grazie al Naviglio) l'è ona gesa catolega de Milan, sede parocchial.
Come 'l sugeriss el nomm, la se troeuva in su la riva del Navili Grand, minga delonsg de la Darsena e de Porta Genova.
Storia[Modifega | modifica 'l sorgent]
Ona prima gesioeula dedicada a la Madonna di Grazzi lì in su la Riva l'è stada atestada giamò in del XVI secol. Defatti in del 1556 l'era staa pientaa su on gesiolin per mettegh denter ona statoa de la Madonna che, se diseva, l'era bon de fà di miracoi. In del secol sucessiv l'è stada sostituida de ona gesa de stil barocch, che l'è fenida brusada in del 1719 e restaurada poch dopo. In del 1849 l'è deventada parocchia.
A la fin del XIX secol la comunità parocchial intorna a la Riva l'era dree a cress, e la gesa l'era minga granda assee: donca s'ha cominciaa a pensà de trà giò la veggia gesa e fànn su vuna noeuva. El primm a presentà on progett a l'è staa l'architett Gaitan Morett: ona gesa de stil liberty con tre navad e cont on gran campanin. Ma el progett che l'ha vinciuu l'è staa quell de l'architett Ceser Nava, in del 1900.
Hann cominciaa a tirà su la gesa noeuva in del 1901, a partì de l'absida e de la crosera; in del 1908 l'è staa tiraa giò l'ultema part de la veggia gesa barocca, menter in del 1909 l'è stada completada tutta la gesa noeuva, foeura che la faciada, che l'è stada minga fada. La gesa noeuva l'è stada inaugurada e consacrada el primm del magg del 1909 de l'arcivescov Andrea Carlo Ferrari.
Alter progett[Modifega | modifica 'l sorgent]
Wikimedia Commons el gh'ha dent imagin o alter archivi su Gesa de la Riva
