Rumàn Capitel Quatordes

Quel articul chì l'è scrivüü in Lumbard, cun l'urtugrafia insübrica ünificada.

Rumàn

La Parola de'l nost Signur ciapada inscí cuma l'è de'l Növ Testament e vultada adess del test uriginal grech in del nost parlà Insübregh del didincö.

Capitel Quatordes

¹Ma ricevii chi l'è dèbul in de la féd, no per i giüdizi i sò upiniún. ²El vün el cred de mangià tüsscoss, ma lü che l'è dèbul el mangia vegetaj. ³Lü che 'l mangia el gh'avarìa no de desprezà lü che 'l mangia no, e lü che 'l mangia no el gh'avarì no de giüdegà lü che 'l mangia, già che Diu 'l l'ha ricevüü. ⁴Chi te see tì, tì che te giüdeghet el servidúr d'un'altra persona? Al sò propi Padrún el sta sald o el borla giò; e 'l sarà faa staa sald, già che 'l Signúr l'è capaz de fàll stà sald.
⁵Già che 'l vün el giüdega un dì püssee d'un alter dì, ma l'alter el giüdega ogni dì; ognidün el gh'avarìa de vèss cunvint in de la sua propia mént. ⁶Lü che 'l giüdega el dì, el giüdega per el Signúr; e lü che 'l mangia, el mangia per el Signúr, già che 'l da grazi a Diu; e lü che 'l mangia no, el mangia no per el Signúr e 'l da grazi a Diu. ⁷Già che nissün de nümm el viv per sé medemm e nissün el mör per sé medemm; ⁸già che se vivum, vivum per el Signúr, e se mörum, mörum per el Signúr. Dunca, se vivum o mörum, sèmm del Signúr. ⁹Già che per chèst Crist l'è mort e l'ha vissüü, per vèss Signúr sura sia i mort che i vivént.
¹⁰E tì, perchè te giüdeghet el tò fradèll? O anca, perchè tì te desprezet el tò fradèll? Già che nümm tücc cumpararèmm denanz al tribünal de Diu, ¹¹già che l'è scritt:
«Mì vivi, el dis el Signúr, che a mì ogni genögg el s'inchinarà
e ogni lengua la cunfessarà a Diu».
¹²Dunca, ognidün de nümm el darà cünt de sé medemm a Diu.
¹³Dunca, gh'avarìum pü de giüdegà el vün i alter: ma pütost giüdeghee chèst, el mètt no d'un scapüsc o un scandul al fradèll. ¹⁴Savi e sun cunvint in del Signúr Gesü che nagott l'è prufan per sé medemm, se no per lü che 'l cunsidera che quajcossa la sia prufana--per lü l'è prufana. ¹⁵Già che se per via de la paciatoria el tò fradèll l'è faa trist, te caminet pü segund el bén; destrüg no cun la paciatoria lü per el qual Crist l'è mort! ¹⁶Dunca, el voster bun el gh'avarìa no de vèss biastemaa. ¹⁷Già che 'l règn de Diu l'è no el mangià e 'l bév, ma la giüstizia, la pas e la letizia in del Spirit Sant; ¹⁸Già che lü che 'l serv Crist in de chèst l'è piasevul a Diu e cetabil a i vèss üman.
¹⁹Dunca, gh'avarìum de cercà i robb de la pas e i robb del fà sü che l'è del vün vèrs i alter. ²⁰Destrüg no el laur de Diu per via de la paciatoria. Tüsscoss hinn debún pür, ma l'è cativ per el vèss üman che 'l mangia per mèzz de scapüsc. ²¹L'è bun el mangià no de carna né 'l bév de vin né chèll in del qual el tò fradèll el scapüscia. ²²La féd che tì te gh'hee, che te gh'hee segund té medemm denanz a Diu. Beatt l'è lü che 'l se giüdega no in de chèll che 'l pröva; ²³ma lü che 'l dübita, se 'l mangia, l'è cundanaa, perchè l'è no de féd; e tütt che l'è no de féd l'è pecaa.

Navigaziun

• ← Indree a Capitel Trides
• Inanz a Capitel Quindes →
• A l'indes