Rubens Barrichello

De Wikipedia

Lombard Occidental

Quel articul chì l'è scrivüü in Lumbard, cun l'urtugrafia insübrica ünificada.
El Rubens Barrichello in del 2010

El Rubens Gonçalves Barrichello (San Paolo, 23 de magg del 1972) l'è un pilota de Formula 1 brasilian, che l'ha gemò desmetüü de corr. L'è ancamò el pilota che l'ha curüü püssee Gran Premi de tücc (323).

I prem agn de cariera[Modifega | modifica 'l sorgent]

El Barrichello el cumincia a corr nel 1993 cun la Jordan, che però chel ann lè l'ha g'ha minga una machina tant forta. La Jordan la migliura l'ann dopu e el Barrichello el ghe riess a salì una volta in sül podi e el finiss la stagion sest in del Campiunaa Piloti. Nel 1995 el rüva segund al Gran Premi del Canada, de dree dumà al Jean Alesi, che el vinc l'ünica gara cun la Ferrari. Nel 1997 el va a la Stewart, in due el tröva una machina che la g'ha una marea de prublemi e la se ritira quasi semper. El ghe riess a fà segund nel Gran Premi de Montecarlo del 1997, ma per el rest i prem du agn in de la scüderia inglesa i porten pochi risultaa. I ropp i cambien nel 1999, cun la Stewart SF3 che la va propi ben. El Barrichello el va tri volt in sül podi e 'l rua setim in del Campiunaa Piloti.

La Ferrari e i ültem agn prima de ritirass[Modifega | modifica 'l sorgent]

Nel 2000 el Barrichello dis de sè a l'uferta de la Ferrari che l'era dree a cercà una segunda guida per el campiòn tudesch Michael Schumacher. La Ferrari in chi agn lè l'è la machina püssee forta de tücc: el Barrichello el rüa dü volt segund in del Campiunaa Piloti (2002, 2004) e 'l vinc növ Gran Premi. Inscè el jüda la squadra a vinc cinch titui di Scüderei de fila, tra el 2000 e el 2004. Nel 2006, quand la Ferrari l'era piö inscè forta, el pasa a la Honda, che però la sudisfa mia i aspetativ. Nel 2009 la Honda la diventa Brawn GP: la machina, la BGP 001, l'è vüna di surpres püssee grandi de la storia de la Formula 1 e la venc ul Campiunaa Piloti cunt el Jenson Button e anca quell di Scüderei. El Barrichello el vinc amò dü Gran Premi, chel d'Europa e chel d'Italia. Nel 2010 el va a la Williams, in due che 'l pasa i ültem dü agn de la sua cariera senza grandi risultaa.