Formula 1

De Wikipedia
Va a: navegá, truvá
Lumbard ucidental Quest articol chì l'è scrivuu in lombard, grafia milanesa.

La Formula 1 (breviaa F1, nomm offizial FIA Formula One World Championship (Campionaa del Mond FIA de Formula 1)) a l’è la categoria de corsa pussee alta per vettur monopost cont roeud minga covert, definida de la Federazion Internazionala de l’Automobil (FIA).
A partì del 1950, quand el gh’hè staa el prim campionaa, el Campionaa del Mond de Formula 1 l’è la categoria de cors per automobil pussee importanta, anca se finn al 1983 a gh’eren anca di cors de Formula 1 minga part del campionaa. La parolla “formula” in del nòmm de la categoria la se riferiss ai regol stabilii che gh’hann de vess respettaa de tucc i vettur.

El Michael Schumacher, el pilota pussee vincent de la storia de la F1, cont 7 titoj e 91 Gran Premi.

Ona stagion de F1 l’è fada su de ona serie de gar ciamaa Gran Premi corruu in su tracciaa spantegaa in tutt el mond. I tracciaa gh’hann de vess consideraa de livell 1 de la FIA; la pupart l’è in autodrom faa su apposta, ma gh’hinn anca di percors cittadin in cittàa coma Montecarlo e Singapor. Tucc i Gran Premi hinn event di trii dì, cont dò session de proeuv liber el venerdì (foeura de Monaco, dova hinn el giovedì), ona session de proeuv liber el sabet mattina, i qualifegh el sabet dopomezzdì, e la gara la domenega dopomezzdì.