Russin (Lombardia)

Quest articol chì l'è scrivud in lombard, con la Noeuva Ortografia Lombarda

Quella vos chi la gh'ha minga di font o inn trop poche. Per pieser, sgionta di font a la vos.
Per havégh un'ideja di altre vos senza font, vardee chichinscì.

Cartell bilengov tajan-lombard (dialet local de tip bergamasch) a l'entrada de Russin

Russin (Rüssì in de la grafia fonetega, Rossino in italian) a l’è ona frazzion del comun de Calolz, in Provincia de Lech (sota Berghem fina al 1992) che se troeuva in de la sezzion de brich de la zitadina, a scirca 450 meter de altituden in sul nivel del mar. Cont el cresser in de l’oltezza in sul nivel del mar, e donca de la distanza da la part prinzipala del comun de Calolz, Russin la ciapa dent i sotanuclei La Ca, Castell, Erola, Boeut, Oneta e Gas. Per vesser domà ona frazzion cont estension piscinina, Russin l’è de bon impiegnida de edifizzi relisos e politegh, ciovè do gese, on musee che el fa part del compless nazzional di musee de la diocesis berghemasca e al prum sit per popolarità e rilevanza, el Castell medieval, privad al di d’incoeu, ma che in manera ipotetega el vegn considerad el Castell de l’Inomenad, vun di sit prinscipai in dova l’era ambientada la storia di “Promessi Sposi” scrivuda dal Lissander Manzon. Fina al 1928 a l’era on comun, despoeu insema a Lorentin e Sucornola l’è vegnuda frazzion de Calolz.

Clima

El clima l'è assee tipegh de l'area prealpina lombarda, nepunemanch grazzia a la soa masgiora altituden, in estad el fa on poo manch cold che in pianura (soratut de nocc) e in inverna la se poeud vidè la fioca on poo pussee despess che in de la banda prinzipala de Calolz, a Olginad o a Lech zità. Defad in di mes invernai el poeud suceder che a fond vall, a Calolz in riva a l'Ada o al Lagh de Olginad el pioeuv, menter a Russin el fioca e quest nepunemanch la distanza in linea d'aria de 3 chilometer e la deferenza d'altituden de zirca 250 meter. A bon cunt in di ultem agn per via di mudamencc climategh, che in de l'Itaja de Mezanocc i hann revardad soratut i bande prealpine, i fiocade inn vegnude sossen pussee rare che in passad, e al di d'incoeu l'è semper pussee normal vidè i temperadure, che in di ore pussee colde i tochen +15°C, sgiamò a fevrer. I precipitazzion medi a l'ann inn de poeugh pussee i 1000 milimeter.

Storia

Russin l’è semper stad ligad al territori de Berghem e a reproeuva de quest l’è assee pensà al fad che sgiamò in del 1331 el staud de Berghem el ligava el so territori a la facta de Porta San Lissander. I statud de la Vall San Martin del 1435 la ciapaven dent in de l’omonem territori. Durant el domini de la Republega de Venezzia, quand che el comun de Russin a l’era vun di so territori pussee de Sira, el pajes l’era rett da vun consol e da du sindegh, elensgiud dal consei sgeneral. In del XVI secol la popolazzion l’era de 265 abitancc e du secoi pussee tard, de 390. Cont l’invasion napoleonega e con la consequenta istituzzion del stad-gioppin franzes de la Republega Zisalpina, Russin l’è stad mètud in del departiment del Seri in del destrett de la Sonna cont capoloeugh Cavrin. In del magg del 1801 la Republega Zisalpina l’ha mètud Russin in del distrett I de Berghem in del departiment del Seri. In del 1802 Russin l’è stad sgiontad a Caren e Valderv, localizad in del distrett X de Puntida e in del 24 de magg del 1804, Russin l’è tornad a vesser comun in de per lu. In de l’ann ufizzial de la fondazzion del Ream de Itaja, in del 1861, Russin el cuntava 508 abitancc. El comun l’era part de la provincia de Berghem e el vegniva ministrad da on sindegh, da ona sgionta e da on consei. In del 1921 la popolazzion de Russin, la cuntava 734 abitancc e el vegniva ministrad da on podestà. In del 1928 el comun de Russin l’è stad abolid e l’è stad sgiontad al comun de Calolz.

Monumencc e sicc d’interess

Gesa del San Lorenz Vegg

La Gesa de San Lorenz Vegg de Russin la gh’ha ona strutura architetonega dai tipeghe forme de la pruma metà del XII secol, nepunemanch el fad che i prume atestazzion che i poeuden vesser troeuvade in di carte del XIV secol. L’edifizzi a navada vunega rettangolera cont absid trapezzoidala, quatadura lignea a viduda e campanon cont monofora in tof, la Gesa Veggia del San Lorenz la gh’ha havud sossen intervencc durant i varie epoche e a testimonianza de quest gh’havem du altar laterai. Di decorazzion presgevoi ad affresch de dent, restauracc de recent, e che inn stacc desegnacc in di secoi XV, XVI e XVII: San Lorenz, San Sebastian e el Crist Pantocrador aproeuv al presbiteri; el San Lorenz a la graticola ed ona Crosfission in de la paret de Mezzdì.

Gesa del San Lorenz Martir

La se trata de la gesa parocchiala de la frazzion e la se troeuva denacc a la gesa del San Lorenz Vegg.

Castell de Russin

El Castell de Russin a l’è on manier de orisgin de l’Età de Mezz che l’è stada vuna di fortezze de la potanta fameja Benai, scior de la Vall San Martin. In del prinzipi el castell el gh’haveva ses tor e incoeu i resten domà dò de lor. Al dì d’incoeu el Castell de Russin l’è privad ed ona soa part la vegn insubida in manera regolera per rezevemencc, matrimoni, feste e disnè. In manera ipotetega el Castell el vegn considerad el Castell de l’Inomenad, vun di sit prinscipai in dova l’era ambientada la storia di “Promessi Sposi” scrivuda dal Lissander Manzon. In del romanz "i Promessi Sposi" l'inomenad a l'è el potant scior al che l'antagonist principal, el Don Rodrigo, el demanda iut per rapì la Lucia Mondella. A l'inizzi l'Inomenad l'aceta de iutal e per on poo el tegn la Lucia imprisonada del franch in del so castell medem. Despoeu de vessess pentid per i soe cative azzion e despoeu d'havegh ciapà la dezision de mudà la soa vita, l'Inomenad el dezid de lassà libera la tosa. Seconda on quai d'oltra ipotesis el prototip del Castell de l'Inomenad el saria inscambi el Castell de Somasca che el se troeuva in de l'omonema frazzion de Vercuragh, ma che incoeu l'è on ruder che el presenta di rest di mura e dò tor.

Curiosità

In del cimiteri de Russin l'è sotrada la cantanta lirega de fama internazzionala Mafalda Favello Signorelli, che durant la soa carriera invidiabela la gh'ha havud l'ocasion de esibiss in del Metropolitan de New York, in del Convent Garden de London, insema a di cantancc coma el Beniamino Gigli, el Mario del Monaco e el Giuseppe di Stefano. In del 1947 l'è stada ciamada per el concert de redervidura de la Scala de Milan sota la direzzion de l'Arturo Toscanini.

Referemencc

1. http://www.lombardiabeniculturali.it/istituzioni/toponimi/5000295/ su LombardiaBeniCulturali, Regione Lombardia.

2. https://www.socialbg.it/a-rossino-dove-riposa-la-cantante-lirica-mafalda-favero-signorelli/ su socialbg.it

3. ^ Archivio il Meteo, su ilmeteo.it. URL consultato il 6 agosto 2018 (archiviato il 7 agosto 2018).

Alter proget

Wikimedia Commons el gh'ha dent imagin o alter archivi su Rossen