Roby Piantoni
|
|
Chest artícol a l'è scricc in Lumbàrt, ortograféa orientàl unificàda. |
Roberto Piantoni, piö cognusìt come Roby, l’éra ün alpinista bergamàsch, nasìt ‘n del 1977 a Còler e mórt in de la nòcc tra ‘l 14 e ‘l 15 de Utùer del 2009 söl Shisha Pagma.
L’è cresìt sö sö i mut, fina de s-cèt l’ gh’à sèmper üt la pasiù de la montagna, dezà che l’éra ‘l s-cèt d’ ün óter grant alpinista, ol Livio Piantoni, po’ a lü mórt zùen, a 29 agn, söl Pukajirka ‘n Perù.
Ol Roby Piantoni l’è dientàt maèstro de alpinìsm e guida alpina in del 2003 e l’à scalàt ol sò prim òt méla, ol Gasherbrun 2, che l’ se tróa ‘n Pakistan.
In del otórno del 2004 l’à tiràt ‘mpé e partecipàt a öna spedisiù söl Manaslu (8.163 m) che l’è ‘n del Nepal) ma l’à dözìt fermàss a 6.600 méter söl lièl del mar.
In de la primaéra del 2005 l’à tiràt ‘mpé e partecipàt ad ün ótra spedisiù söl Broad-Peak (8.048 m) in Pakistan e chèsta ólta l’è riàt sö sö la sima.
Ol 26 de Mas del 2006 l’à coronàt ü sògn che l’ portàa ‘n del cör fina de s-cèt, l’è riàt sö la sima del Everest, ol mut piö ólt del mónt sènsa dovrà i bómbole de l’usìgen.
Po’ l’à scalàt ol Muztagh-Ata de 7.548 méter, che l’è ‘n Cina e l’è riàt in sima co gli sci, ol Pisang-Peak (6.101 méter), ‘l Island-Peak (6.189 méter) che l’è ‘n Nepal, ‘l Aconcagua (6.963 méter) in Argentina in del 2007.
L’è mórt in del 2009 in de la nòcc tra ‘l 14 e ‘l 15 de Utùer söl Shisha Pagma, ü di 14 òt méla, ‘ntàt che l’ sircàa de dèrf öna via nöa ‘nsèma a dü óter alpinìst bergamàsch, ol Marco Astori de Doséna e ‘l Yuri Parimbelli de Seriàt, e al valtelinés Adriano Greco.