Region Ministrativa Special (China)
|
Quest articol chì l'è scrivud in lombard, con la Noeuva Ortografia Lombarda |
In China una Region Ministrativa Special a l'è 'na division ministrativa de nivell provincial che, in del vesser part integral del Pais, gh'hann el nivell pussee gross de autonomia del governo central, anca se 'l Congress Nazzional del Popol el guarna el dirit de meter su di lesg per lor.
La bas legala per fài su a l'è dada de l'articol 31 de la Costituzzion de la China del 1982, che la dis che "el Stat el po fà su, se 'l gh'è de besogn, di region ministrative speciai. El sistema che i organiza el sarà dad foeura de 'na lesg del Congress Nazzional del Popol in bas ai circostanze", menter per i alter entità a l'è dada de l'articol 30. L'articol 31 a l'è stad sgiontad in previdenza del dialegh cont el Regn Unid per l'unifegazzion de Hong Kong e l'è insubid anca per 'na possibel unifegazzion cont el Taiwan.
Al dì d'incoeu a gh'è do de 'sti region: Hong Kong e Macao, fioeule de la deciarazzion congionta sino-britannega del 1984 la prima e de la deciarazzion congionta sino-portoghesa del 1987 la segonda, che inn di tratad vincolant registrad ai Nazzion Unide che garantissen, in bas ai so lesg fondamentai, un gran nivell d'autonoma, tant che inn no considerad 'me part de la China continental de la pupart di autorità.
In bas al principi Un Pais, du sistema, el governo de Pechin el se ocupa di afar forester e de defesa per i do Region, menter el rest di competenze resten in man ai autorità locai, che mantegnen la soa legislatura pluripartitega, sistema legal, forza de polizzia, territori dovanal separad, politega migratoria, lesg del trafegh, lengov ofizziai e sistema educativ, oltra a la rapresentanza in d'una quaj istituzzion internazzional e sportiva.
A inn minga de sconfonder cont i Zone Economeghe Speciai, che inn di bande indova che gh'è di lesg speciai per jutà el desvilup economegh e favorì i investiment, o con la Region Ministrativa Special de Wolong, che l'è una reserva natural.
Riferiment
[Modifega | modifica 'l sorgent]Alter proget
[Modifega | modifica 'l sorgent]
Wikimedia Commons el gh'ha dent imagin o alter archivi su Region Ministrativa Special (China)
