Redit de citadinanza (Italia)
|
Quest articol chì l'è scrivud in lombard, con la Noeuva Ortografia Lombarda |
El redit de citadinanza a l'è un sussidi che 'l gh'è in Italia del 2019, volud del governo Conte I, che a dispet del nom a l'è minga una forma de redit de bas ma l'è pussee vesin a 'n redit minim garantid, in ogni modo condizzionad e minga individual. Del 1 de sginer del 2024 el sarà pu dad.
Poden ciapàll domà quei che lavoren minga o che lavoren ma gh'hann un ISEE assee bass, l'è ligad al nucli familiar e se vun che 'l ciapa l'è bon de lavorà el gh'ha de iscrivés a 'n center per el lavorà, fà di mester de publega utilità se ghe 'l domanden e al refudà el terz lavorà che ghe ofrissen perden el sussidi.
L'è vert ai citadin italian e anca ai forester che viven in Italia regolarment de almen des agn: i citadin minga UE gh'hann de otegnì, a so spese, vari certifegad di autorità del Pajes d'origin.
'Na voeulta che l'INPS l'ha vist la domanda e l'ha did che gh'è i requisit, se ciapa una carta prepagada che se po doperàlla per crompà la roba, e se po ciapà anca una part in carta. La carta l'è poeu recaregada ogni mes con la zifra che vun el gh'ha dirit.