Programa Viking
|
|
Chest artícol a l'è scricc in Lumbàrt, ortograféa orientàl unificàda. |
El programa Viking l'è stàt en progràma scentìfich progetàt e realizàt de la NASA endei agn '70 del sècol XX. El cunsistìa en dò sónde spasiàle automàtiche sènsa equipàgio spedìde söl pianéta Marte. Le dò sónde i éra denuminàde Viking 1 e Viking 2 e i éra furmàde de dò parcc ognöna: en orbiter che 'l'ìa destinàt a restà en òrbita entùren al pianéta e en lander che 'l se destacàa del orbiter per nà a postàs sö la superfìce del pianéta. L'è stàda la misiù piö càra e ambisiùza mai spedìda a stüdià Marte, condena spéza totàl de presapóch 1000 miliù de dòlari de alùra. Sóta töcc i póncc de vìsta el progràma Viking l'è stat en söcès e la g'ha portàt la gran part de le 'nformasiù sö Marte che se g'ha ìt a dispuzisiù 'nfìna ai agn '90 e ai prim rovers che g'ha esploràt la superfìce marsiàna.
El Viking 1 l'è stat lanciàt ai 20 de óst del 1975 e 'l Viking 2 ai 9 de setèmber del stès an, töte dò portàde en òrbita del vetùr Titan III-E. 'Na ólta riàde endel'òrbita de Marte, per divèrsi més, le dò sónde el g'ha efetuàt en rileamènt fotogràfich de la superfice; dòpo ìga selesiunàt i sicc de ateràgio, le dò sesiù de la sónda le s'è separàde, e i du lander i è penetràcc endel'atmosféra del pianeta, e le s'è postàde abelazìne endel sit che gh'ìa stat ctàt fò. I orbiter entàt i è nacc en nacc a fotografà e a portà 'n nacc de le ótre operasiù scentìfiche. I lander envéce i analizàa la superfìce gràsie a la strömentasiù scentìfica e i mandàa a la Tèra i rezültàcc e le fotografìe töde zó.