Prima Giuan Capitel Düü

Quel articul chì l'è scrivüü in Lumbard, cun l'urtugrafia insübrica ünificada.

Prima Giuan

La Parola de'l nost Signur ciapada inscí cuma l'è de'l Növ Testament e vultada adess del test uriginal grech in del nost parlà Insübregh del didincö.

Capitel Düü

¹I mè fiöö, mi scrivi chest coss perchè vialter pechii no. Ma se quajdün el peca, nümm gh'èmm un aucatt denanz al Pader, Gesü Crist, el giüst. ²E Lü l'è la prupiziaziun per i noster pecaa, e no dumà per i noster, ma anca per chell de tütt el mund. ³E de chest nümm savèmm che l'èmm cunussüü: se nümm usservum i so cumandament. ⁴Chi 'l dis che 'l gh'ha cunusüü e l'usserva minga i so cumandament, lü l'è un busiard, e la veritaa la gh'è no in de lü. ⁵Ma chissessìa l'usserva la sua parola, el bén de Diu l'è faa veramént perfètt in de lü: de chest nümm savèmm che stèmm in de Lü. ⁶Chi 'l dis che 'l resta in de Lü, el dev caminà anca lü cuma Lü el camina.
⁷Predilett, mì a ve scrivi minga un növ cumandament, ma un vègg cumandament che vialter gh'avii avüü del prenzipi. El vègg cumandament a l'è la parola che vialter avii sentii. ⁸A bun cünt, mi te scrivi un növ cumandament che l'è ver, in de Lü e in de vialter, perchè el scür l'è passaa e la vera lüs già la sbarlüs. ⁹Chi 'l dis che l'è in de la lüs e l'odia 'l so fradèll, lü l'è in del scür fin'a adèss. ¹⁰Chi 'l vör bén el to fradèll el resta in de la lüs, e el gh'è minga scandul in de lü. ¹¹Ma chi l'odia 'l to fradèll, lü l'è in del scür, el camina in del scür, e 'l sa no due 'l va, perchè el scür l'ha faa orb i so öcc.
¹²Mì ve scrivi, bagaj, perchè i voster pecaa hinn staa perdunaa per via del so nomm.
¹³Mì ve scrivi, pader, perchè vialter l'avii cunussüü Lü che l'era del prenzipi.
Mì ve scrivi, giùitt, perchè vialter avii vinciüü el malign.
Mì v'huu scrivüü, bagaj, perchè vialter avii cunussüü 'l Pader.
¹⁴Mì v'huu scrivüü, pader, perchè vialter l'avii cunussüü Lü che l'era del prenzipi. Mì v'huu scrivüü, giùitt, perchè vialter sii fort, e la parola de Diu la resta in tra de vialter e vialter avii vinciüü el malign.
¹⁵Vurii minga vialter bén el mund né chell che 'l gh'è in del mund. Se quajdün el vör bén el mund, el bén del Pader el gh'è no in de lü: ¹⁶perchè tüsscoss che 'l gh'è in del mund--la vöja de la carna, la vöja di öcc, e l'urgoli de la vida--l'è no del Pader, ma l'è del mund. ¹⁷E 'l mund l'è dree a nà via e 'l so desidéri, ma lü che 'l fa la vuluntà de Diu el resta per semper.
¹⁸Bagaj, a l'è l'ura ültima, e cuma vialter avii sentii che 'l ven l'anticrist, adèss hinn vegnüü tant anticrist; dunca nümm savèmm che l'è l'ura ültima. ¹⁹Lur hinn naa via de nümm, ma eren no de nümm, già che se lur eren de nümm, avarìen restaa cun nümm; ma perchè 'l sia bell ciar che hinn no tücc de nümm. ²⁰E vialter gh'avii un vung del Sant, e savii tücc. ²¹Mì v'huu scrivüü no perchè vialter savii minga la veritaa, ma perchè la savii e perchè ogni büsìa a l'è no de la veritaa. ²²Chi l'è 'l busiard se no lü che 'l nega che Gesü a l'è 'l Crist? Chest a l'è l'anticrist: lü che 'l nega 'l Pader e 'l Bagaj. ²³Tücc che neghen el Bagaj el gh'ha minga 'l Pader; lü che 'l cunfessa 'l Bagaj anca 'l gh'ha 'l Pader. ²⁴Che 'l restaga in de vialter che avii sentii del prenzipi! Se 'l resta in de vialter che avii sentii del prenzipi, vialter restarii in del Bagaj e in del Pader. ²⁵E chesta l'è la prumèssa che Lü m'ha faa: la vita eterna.
²⁶Mì v'huu scrivüü chest coss sül cünt de lur che ve trann matt. ²⁷E 'l so vung che vialter avii ricevüü de Lü el resta in de vialter, e gh'avii minga besogn che quajdün el ve insegna, ma cuma el so vung el ve insegna sü tüsscoss--l'è ver e l'è no una büsia--e inscì 'l v'ha insegnaa, restii vialter in de Lü.
²⁸E adèss, bagaj, restii vialter in de Lü, perchè se 'l cumpar, nümm avarìum cunfidenza e sèmm minga staa vergugnus de Lü quand el vegnarà. ²⁹Se vialter savii che l'è giüst, vialter savii che anca ognidün che 'l fa la giüstizia l'è staa nassüü de Lü.

Navigaziun

• ← Indree a Capitel Vün
• Inanz a Capitel Trii →
• A l'indes