Prima Curinz Capitel Sett

Quel articul chì l'è scrivüü in Lumbard, cun l'urtugrafia insübrica ünificada.

Prima Curinz

La Parola de'l nost Signur ciapada inscí cuma l'è de'l Növ Testament e vultada adess del test uriginal grech in del nost parlà Insübregh del didincö.

Capitel Sett

¹E sü i robb che avii scritt, «l'è bun per un omm tucà minga una dona»; ²Ma per via di furnegaziún ogni omm el gh'avarìa d'avègh la sua propia miee, e ogni dona la gh'avarìa d'avègh el sò propi marì. ³L'omm el gh'avarìa de dà dedree el debit a la sua miee, e in de l'istèssa manéra anca la dona al sò marì. ⁴La dona la gh'ha minga l'auturitaa sura 'l sò corp, ma l'omm, e in de l'istèssa manéra l'omm el gh'ha minga l'auturitaa sura 'l sò corp, ma la dona. ⁵Depriveev no el vün l'alter, se no per un témp d'un acordi, perchè siuv liber per la preghéra, e alura siuv insèma de növ, perchè 'l Satana el ve tenta no per via de la vostra mancanza de cuntroll de vialter medemm. ⁶E disi chèst per cuncessiún, no per cumandamént; ⁷e vöri che tücc i vèss üman sien cuma anca mì medemm: ma ognidün el gh'ha el sò propi regall de Diu, el vün quij inscì, l'alter quij inscì.
⁸E disi per quij che hinn spusaa no e per i veduv: l'è bun per lur se resten cuma anca mì; ⁹e se gh'hann minga cuntroll de sé medemm, gh'avarìen de spusàss, già che l'è mèj spusàss che brüsà.
¹⁰E per quij che s'hinn staa spusaa, cumandi, no mì ma el Signúr, che la dona la se separa no del marì, ¹¹ma se 'l s'è staa separaa, la gh'avarìa de restà sénza spusàss, o la gh'avarìa de recunciliàss cunt el marì, e l'omm el gh'avarìa de mandà via la miee.
¹²E per i alter disi, mì, no el Signúr: se quajdün el gh'ha un miee che la cred no e lee la dis de sì de stà de cà cun lü, el gh'avarìa no de mandàla via; ¹³e una dona che la gh'ha un marì che 'l cred no e lü el dis de sì de stà de cà cun lee, la gh'avarìa no de mandàll vua. ¹⁴Già che l'omm che 'l cred no l'è staa faa sant in de la miee, e la dona che la cred no l'è stada fada santa in del fradèll; degià che sedenò i voster bagaj sarìen burdegh, ma adèss hinn sant. ¹⁵E se lü che 'l cred no el se separa, el gh'avarìa de separàss; el fradèll o la surèla l'è faa minga un sèrv in di taj coss; e in de pas Diu el v'ha ciamaa.¹⁶Già che cuma te see, dona, se te salvaree l'omm? O cuma te see, omm, se te salvaree la dona?
¹⁷Se no, a ognidün cuma Diu l'ha smezaa, ognidün cuma Diu l'ha ciamaa, inscì el gh'avarìa caminà, e cumandi inscì in de tücc i gés. ¹⁸Quajdün l'è ciamaa cuma circuncis? El gh'avarìa no de devegnì incircuncis; quajdün l'è staa ciamaa in d'incircuncisiún? El gh'avarìa no de fàss circuncid. ¹⁹La circuncisiún l'è nagott, e l'incircuncisiún l'è nagott, ma l'usservanza di cumandamént de Diu. ²⁰Ognidún el gh'avarìa de restà in de la ciamada in de la qual l'è staa ciamaa. ²¹Te see ciamaa cuma s'ciav? Preucupet no; ma se anca te podet devegnì liber, l'è mèj che te la dovret. ²²Già che lü che l'è staa ciamaa s'ciav in del Signúr l'è l'omm liber del Signúr. ²³Sii staa cumpraa a un prézi: devegnii minga s'ciav di vèss üman. ²⁴Ognidün el gh'avarìa de restà, fradèj, in de chèll che l'è staa ciamaa cun Diu.
²⁵E sü i vergitt gh'huu minga un cumandamént del Signúr, ma duu un'upiniún cuma ricevüü misericordia del Signúr per vèss fedél.
²⁶Dunca, cunsideri chèst, l'è bun per via de la necessitaa presénta, che l'è bun per una persona de vèss cuma l'è. ²⁷Te see ligaa a una miee? Cerca no de vèss deslenguaa; te see staa deslenguaa d'una miee? Cerca no una miee. ²⁸E se anca te se see spusaa, t'hee pecaa no, e se una vergin la marida, l'ha pecaa no; ma i taj gh'avarànn tribülaziún in de la carna, ma mì ve sparmi. ²⁹E disi chèst, fradèj, el témp l'è scürtaa; per el rest, che quij che gh'hann miee sien cuma quij che i gh'hann no, ³⁰e quij che piangen sien cuma quij che piangen no, e quij che gh'hann letizia sien cuma la gh'hann no, e quij che cumpren sien cuma quij che tegnen no, ³¹e quij che duvren el mund sien cuma quij che 'l duvren no; già che la furma de chèst mund la passa via.
³²Ma vöri che siuv sénza ansia. Lü che 'l s'è minga spusaa l'è ansiús per i robb del Signúr, cuma el poda piasè 'l Signúr; ³³ma lü che 'l s'è spusaa l'è ansiús per i robb del mund, cuma 'l poda piasè la sua miee, ³⁴e lü l'è staa smezaa. E la dona che la s'è minga spusada e la vergin hinn ansiús per i robb del Signúr, per vèss sant sia in del corp che in del spirit; e lee che la s'è spusada l'è ansiús per i robb del mund, cuma la poda piasè el sò marì. ³⁵E disi chèst per el prufitt de vialter medemm, no per pundà un lazz sü vialter, ma per chèll che l'è decurús e dedit al Signúr sénza distraziún.
³⁶E se quajdün el cunsidera che el se cumpurta maa a la sua vergin, se l'è ultra 'l fiúr de l'etaa, e 'l gh'avarìa de süced inscì, el gh'avarìa de fà chèll che 'l vör, el peca no: gh'avarìen de spusàss. ³⁷E lü che l'è staa sald in del sò cör e 'l gh'ha minga necessitaa, e 'l gh'ha auturitaa sura la sua vuluntaa e l'ha decis in del sò propi cör de tegnì la sua propia vergin, el farà bén. ³⁸Dunca, lü che anca 'l ciapa la sua propia vergin el fa bén, e lü che 'l se spusa no el farà mèj.
³⁹Una dona l'è ligada per tant témp che 'l sò marì el viva; ma se 'l sò marì el dorma, l'è libera de maridà lü che la vör, dumà in del Signúr. ⁴⁰Ma l'è püssee beatt se la resta cuma l'è, segund la mia upiniún; già che me pensi anca mì d'avègh el Spirit de Diu.

Navigaziun

• ← Indree a Capitel Ses
• Inanz a Capitel Vott →
• A l'indes