Pianificazzion lenguistega
|
Quest articol chì l'è scrivud in lombard, con la Noeuva Ortografia Lombarda |
Con pianificazzion lenguistega se parla di sforz intenzionai per influenzà el comportament di olter relativament a l'aquisizzion, a la strutura o a la collocazzion fonzional de una lengua. Quella atività chì de solit la trà insema el desvilup di fin, obietiv e strategie per cambià la manera che la lengua l'è dovrada. A nivell governativ, la pianificazzion lenguistega la vegn la politega lenguistega.
Tante nazzion i gh'hann organism de regolamentazzion lenguistega che i gh'hann el fin precis de trà insema e efetuà i politeghe de pianificazzion lenguistega. Anca i aspet economegh de la pianificazzion lenguistega poden vesser important: l'è assee per esempi pensà ai mercad de prodot ben ligad a la lengua (film, liber, software, etc...) - e inn lavorà de studi de l'economia lenguistega.
La pianificazzion lenguistega l'è despess associada a la pianificazzion de govern, ma l'è anca dovrada di organizazzion minga governative compagne de organizzazion popolar opur persone indeperlore. I obietiv de quell tipo chì de pianificazzion i varien.
Carateristeghe
[Modifega | modifica 'l sorgent]El termin pianificazzion lenguistega l'è despess riferid al terz mond, el prim interessad del fenomen, che el se po intender compagn de un strument per fà su lengov nazzionai standardizade 'me toch de la modernizazzion e costruzzion de una nazzion. De tute i manere, la pianificazzion lenguistega l'è minga un fenomen né particolarment recent e gnanca confinad al terz mond.
Categorie
[Modifega | modifica 'l sorgent]La pianificazzion lenguistega la po vesser spartida in tre categorie:
Pianificazzion del corpus
[Modifega | modifica 'l sorgent]Per pianificazzion del corpus lenguistegh se parla de l'intervent prescritiv in del corpus de una lengua, o ben in del compless di so forme espressive. Quella roba chì la se poeu otegnì cont el fà su parole o espression noeuve, cont el modifegànn di vegge o cont el catà foeura in tra forme alternative. La pianificazzion del corpus la ponta a desvilupà resorse de una lengua in manera che la vegna un mez de comunicazzion per argoment e forme de discors moderne, dotad de terminologia ciamada per l'usagg in di camp aministrativ, educativ e inscì inanz. La pianificazzion del corpus l'è despess ligada a la standardizazzion de una lengua, che la comporta la predisposizzion de un'ortografia, de una gramatega e de un dizzionari de sgener normativ per la guida di scritor e di parlant de una comunità lenguistega. Anca i sforz per el purism lenguistegh e per tegnì foeura i parole foreste (o ben el protezzionism lenguistegh) inn part de la pianificazzion del corpus, inscì 'me la reforma ortografega e l'introduzzion de noeuv sistema de scritura. Per una lengua che inanz l'era minga scrivuda, el prim pass de la pianificazzion lenguistega l'è propi el desvilup de un sistema de scritura.
Pianificazzion del status
[Modifega | modifica 'l sorgent]Per pianificazzion del status lenguistegh se parla di sforz volontari a destinà i fonzion di lengov e di alfabetizazzion dent de una comunità lenguistega. La tra insema scernide de status, che i fann vegnì una lengua o varietà una "lengua oficiala", "lengua nazzionala" e inscì inanz. Despess el voeul dì de svalzà una lengua o dialet a varietà de prestisg.
Pianificazzion de l'aquisizzion
[Modifega | modifica 'l sorgent]Per pianificazzion de l'aquisizzion lenguistega se parla de l'insegnament e l'imprendiment di lengov nazzionai, lengov segonde o lengov foreste. Quella roba chì la trà insema l'impegn a fà cresser el numer de persone che dovren quella lengua lì, el so spantegament e la so alfabetizazzion, otegnid travers de la creazzion di noeuve oportunità e incentiv per l'imprendiment. Quei sforz chì i poeuden basàss in su politighe de assimilazzion o pluralism. La pianificazzion de l'aquisizzion l'è diretament ligada al spantegament lenguistegh.
Bibliografia
[Modifega | modifica 'l sorgent]- DELL'AQUILA, Vittorio & IANNACCARO, Gabriele (2004) La pianificazione linguistica. Lingue, società e istituzioni. Roma: Carocci
- BASTARDAS-BOADA, Albert (2007) "Linguistic sustainability for a multilingual humanity", Glossa. An Interdiscipinary Journal, vol. 2, n. 2.
- BASTARDAS-BOADA, Albert (2002)"World language policy in the era of globalization: Diversity and Intercommunication from the perspective of 'complexity'", Noves SL. Revista de Sociolingüística.
- BASTARDAS-BOADA, Albert (2002), “The Ecological perspective: Benefits and risks for Sociolinguistics and Language Policy and Planning”, in: Fill, Alwin, Hermine Penz, & W. Trampe (eds.), Colourful Green Ideas. Berna: Peter Lang, pp. 77–88
- TAULI, V. (1968) Introduction to a theory of language planning, Uppsala
- CALVET, L.J. (1987) La guerre des langues et des politiques linguistiques. Payot, Paris
- COBARRUBIAS Juan, & FISHMAN Joshua (1982) (ed.) Progress in language planning: international perspectives, coll. Contributions to the sociology of language n° 31, Berlin/New York/Amsterdam: Mouton
- COOPER, R. L. (1989) Language planning and social change, Cambridge University Press, New-York
- FISHMAN, Joshua (1974) (ed.) Advances in Language Planning, The Hague: Mouton
- ZUCKERMANN, Ghil'ad (2020) Revivalistics: From the Genesis of Israeli to Language Reclamation in Australia and Beyond. Oxford University Press (ISBN 9780199812790 / ISBN 9780199812776)