Papa Emerit
|
Quest articol chì l'è scrivud in lombard, con la Noeuva Ortografia Lombarda |
.jpg)
Papa Emerit a l'è stad el titol dad al Benet XVI quand che l'ha renonziad a l'ofizzi del Roman Pontefice el 28 de fevrer 2013. A l'è minga scrivud dent de nissuna norma de la Gesa Catolega ma a l'è ciapad de analogia de quell de vescov emerit, oltra al codes de dirit canonegh che 'l parla de la carega de emerit per quei che se dimeten de 'na carega o inn trop vegg e gh'hann de lassàlla.
Anca se l'è minga regollada el Papa Francesch l'ha vert a la possibilità che ghe sarann di alter Papa Emerit, pussee inanz. Rispet al Papa quell in carega el met minga la fascia e la pellegrina con la sotana, el gh'ha domà l'anell del vescov e no quell del pescator e 'l met minga i scarpete rosse. El resta comunque ciamad "Soa Santità" o "Pader Sant".
A gh'è comunque de la controversia in su la scerna de 'sto titol, vari teolegh pensen che de papa el po vességh domà vun, di esempi inn el Manuel Jesús Arroba de la Pontificia Università Laternanesa e 'l Gianfranco Ghirlanda, vegg retor de la Pontificia Università Gregoriana, che 'l insubiva el titol de "Vescov emerit de Roma", ma gh'è anca di vos a favor, per esempi quella del Stefano Violi, professor de dirit canonegh a Bologna e Lugan, che l'ha did che 'l Benet l'ha renonziad domà a esercità el ministeri del Peder e minga al ministeri del tut, a restà al servizzi de la Gesa. In del 2018 el Papa Emerit midem l'ha did che el papad emerit a l'è 'na forma giuridegh-spiritual che la schiva ogni penser de coesistenza in tra du Papa, desgià che, 'me ogni sed vescovil, el Papad el po havégh domà un propietari, ma che la mostra un ligam spiritual che 'l po minga vesser tajad.