Option Canada
|
|
Chest artícol a l'è scricc in Lumbàrt, ortograféa orientàl unificàda. |
L’ Option Canada l’è stàcia öna organizasiù tiràda ‘mpé de nascondù e finansiàda dal Goèrno del Canada e per ès piö precìs dal Consèi per l’Ünità Canadéza e che la sé dàcia de fà per ötà chi del NO al referèndum per l’indipendènsa del Québec.
L’è stai tiràt ‘n pé ol 7 de setèmber del 1995 piö o méno 8 setimàne prima del referèndum e l’è stai facc isparì öna quach mis dòpo e töt chèsto l’è stai fai a dispèt di lègi del Québec.
Ol presidènt de l’Option Canadà l’éra ol Claude Dauphin che l’ lauràa per ol Paul Martin a l’època Ministro di Finànse.
In de l’Option Canada i gh’éra dét òm de afàre e i trì piö ‘mportàncc partìcc federalìst ol Parti libéral du Canada, ol Parti libéral du Québec e ‘l Parti progressiste-conservateur du Canada.
L’Option Canada l’à ötàt la zét che la stàa piö de cà ‘n Québec da méno de dù agn a restà ‘n di léste di vòtàncc del Québec per ìga l'istès ‘l dirit de otà segónt chèl che la dis öna lège del 1989.
Söbet dòpo ‘l referèndum ol Diretùr di elesiù del Québec l’à acüzàt l’Option Canada de i mia rispetàt i lègi del Québec, ma dòpo che la Curt Costitusiunàla l’à dicc che ‘n de la lège eletoràl dal Québec gh’éra dèt di laùr mia legài l’à dözìt lasà pèrt.
Ol lìber Les Secrets d'Option Canada
[Modifega | modifica 'l sorgent]La stòria de l’Option Canada l’è egnìda fò amò turna in del 2006 quando ol Normand Lester e ‘l Robin Philpot i à püblicàt ü lìber ‘ntitulàt Les Secrets d'Option Canada. I dù scritùr i ghe sarès riàcc a mèt i mà sö öna casa de docümèncc segrécc piéna de lètere e de fatüre.
Ol giödes Bernard Grenier
[Modifega | modifica 'l sorgent]L’è pò stacia facia ön inchièsta portàda ‘nacc dal Bernard Grenier, ü giödes ‘n pensiù de la Curt Söperiùra del Québec. A la fì l’è saltàt fò che ‘l lìber l’à esageràt ‘n del daga di cólpe a tace pulìtech che sömèa che i ghe entràa mia o che i éra fai negóta de mal, ach se i dù scritùr i à domandàt de 'ndagà mèi.
In töte i manére l’è egnìt fò che, se ach l’Option Canada l’à mia spendìt in manéra mia legàl i 3.500.000 dòlari che i dizìa ol Normand Lester e ‘l Robin Philpot, de sigür segónt ol Bernard Grenier, n'à spendìt però almanch 539.000 dòlari.