Moviment del Prenzep Felip

De Wikipedia
Lombard Quest articol chì l'è scrivud in lombard, con la Noeuva Ortografia Lombarda
Duu bagaj de la tribù di Yaohnanen inzebissen di fotografie del prenzep, tratade in del villasg compagn de di reliquie religiose del valum assossenn inestimabel.

El moviment del prenzep Felip l’è una corrent religiosa nassuda e prategada in d’un quaj villasg in su un’isola de l’arzipelegh de Vanuatu,[1] in Oceania, indova i sœu abitant veneren el prenzep Felip — om de la regina Lisabeta del Regn Unid e bobà del rè Carla III — compagn de un dia.

Orisgen[Modifega | modifica 'l sorgent]

El tut l’è partid de un mit ligad a di vegge favele de la tribù di Yaohnanen, indova se parla del fiœul de l’ispiret de una montagna, e de coma quest chì l’havess viasgiad per mar e oceen fina a rivà in d’una terra lontana indova l’è finid par sposà vuna di done pussee potente del mond.[2]

Quand che i sgent di tribù Yaohnanen e Takel hann vedud per la prima vœulta el respecc e la reverenza che i ofizziai coloniai britanegh ghe daven a la regina Lisabeta, i eren rivad a la conclusion comuna che el marid de lee chì l’era per forza propri el s’cet de l’ispiret de la montagna inscì coma a vegneva cuntad in di soe storie e lesgende popolare.[2][3]

A l’è minga ciar quand che questa credenza la saja vegnuda su, ma a parariss pu o manca intorna ai agn ‘50 o ‘60 del 1900, siben la saja deventada anmò pussee forta quand che la cobia real l’è andaita a Vanatu per una visita ofizzial in del 1974, e i locai hann donca havud la possibilità de vedé el prenzep a stà delonsg per la prima vœulta.[2] El prenzep el saveva nagot de la corrent religiosa, desgià che el sarà informad de la soa presenza nomà un quaj agn pussee tard del John Champion, el comissari resident britanegh.[4][2]

Interazzion cont el prenzep Felip[Modifega | modifica 'l sorgent]

El scior Champion l’ha sugerid al prenzep de mandàgh un so litrat a quei sgent chì per vedé la soa reazzion, e lu l’ha in fin decidud de mandàgh debon una soa fotografia autografada. La reazzion dei abitant de l’isola l'è rivada subit: in responsa gh’hann de fait mandad al prenzep Felip una di soe mazze tradizzionai ciamade nal-nal, soratut dovrade de chistor per copà i porscei; quell che ghe ciamaven al prenzep l’era donca che el se fasess un’oltra foto, ma questa vœulta con la soa mazza de lor in man. El Felip l’haveva no capid inscì tant i motivazzion dedree al gest ma — desgià che la situazzion la le divertiva e senza ben savé cossa l’era adree a fà — l’ha azzetad de fàss fà un’oltra foto con la mazza in man.[2] Per i abitant di tribù, però, el vedéssel propri lilinscì cont in man vuna di soe mazze rituai l’è staita la prœuva inrefudabila de la divinità del prenzep Felip.

In del 27 de setember del 2007, Channel 4 l’ha mandad in onda Meet the Natives, un reality show in su cinch omen de la tribù di Tana e devot mat del prenzep Felip. El viasg l’è finid cont un inconter off-screen propri cont el prenzep Felip medem; a s’inn scambiad di nœuv candò, intra i quai un’oltra foto del prenzep de dovrà in di soe orazzion.[5] In del show, quist chì paragonen l’inconter a un’esperienza mistega e transcendental, e Buckingham Palace a la dimora de un dia.

Reazzion a la mort del prenzep Felip[Modifega | modifica 'l sorgent]

El prenzep Felip e la regina Lisabeta in del 1953.

In de l’avril del 2021, el moviment el s’è assossenn dannad per la mort del prenzep. Yapa, el grand cap de la tribù, l’ha infinamai mandad i soe condojanze a la fameja regal e a tut el popel del Regn Unid. In di semane adree, i abitant del villasg s’inn radunad per condù di rit in onor de l’ispiret del prenzep — che per lor l’è adess tornad indree a la soa natura divina e ai soe montagne in su l’arzipelegh de Vanuatu — e una mota de porscei inn anca stait copad fœura in di zeremonie funerarie per fazzilità el passasg de l’ispiret del prenzep Felip in del dedelà. Impunemanch, l’antropolegh Kirk Hufman l’ha deciarad che i tribù havarissen transferid la soa devozzion al rè Carla, che l’haveva visitad l’arzipelegh in del 2018 e personalment cognossud i grand cap di tute i tribù.[6]

Referenze[Modifega | modifica 'l sorgent]

  1. Eror de sintassi: Eror in l'utilizazzion del marcador <ref>: a l'è stad indicad nissun test per el marcador Roberts
  2. 2,0 2,1 2,2 2,3 2,4 Davies, Caroline (10 April 2021). "Prince Philip: the unlikely but willing Pacific deity", The Guardian. 
  3. Eror de sintassi: Eror in l'utilizazzion del marcador <ref>: a l'è stad indicad nissun test per el marcador BBC-Tanna
  4. The island that worships Prince Philip is disappointed by his retirement (en-GB).
  5. Hoggart, Paul (11 September 2007). "Meet the Natives", Broadcast. 
  6. Squires, Nick (9 April 2021). "Spiritual succession: Vanuatu tribe who worshipped Prince Philip as a god will now deify Charles", The Telegraph. 

Ligam de fœura[Modifega | modifica 'l sorgent]