Mazz Viscont-Sforza

Quest articol chì l'è scrivud in lombard, con la Noeuva Ortografia Lombarda

Di carte del mazz Pierpont-Morgan de Bergom.

I mazz Viscont-Sforza inn pu o manch quindes mazz de carte de taroch incomplet fait su in del secol quell de 15 per volé del Filip Maria Viscont prima, e del sò sgener Franzesch Sforza de pœu, e inn vegnude ol modell e la font d’ispirazzion prenzipal par ogni mazz de taroch che a gh’è al dì d’incœu. I inn anca pœu i mazz de carte de taroch pussee vegg che esisten, e inn donca conservad nomà in de di musee particolar spantegad in tut ol mond.

I carte che inn restade infinadess inn importante soratut per la soa bellezza estetega e la finisia de detaj artistegh cont ol qual i inn staite fosgiade; i imagen che figuren in di soe art depensgen per ol solet di member de Cà Viscont e Cà Sforza, tucc picciurad cont i vestiment dovrad in de l’epoca che hann vivud. De là de vesser propri bei, donca, i carte Viscont-Sforza pœuden anca vesser vedude coma una testimonianza de la vita de tucc i dì e di costum che la sgent la gh’haveva ai temp del Ducad de Milan e, per estension, in de la Lombardia intrega in del cors del Renassiment lombard.

Pierpont-Morgan Bergom

Ol mazz Pierpont-Morgan l’è vun di trii mazz de taroch pussee famos di carte Viscont-Sforza. Ghe disen anca “Coleon-Bajon” o “Franzesch Sforza” e i inn staite faite su intorna al 1451. In prenzipi compognud de 78 carte, ghe n’è restad infina al dì d’incœu nomà 74. I inn soratut conservade in del Morgan Library & Museum a Nœuva York, e in di conlezzion privade de la fameja Coleon a Bergom.

• 
  Ol pirla.
• 
  L’imperadriz.
• 
  L’imperador.
• 
  La mort.
• 
  Cavall de cope.
• 
  Sett de or.

Cary-Yale

Nominad per la conlezzion privada de carte de sgiœugh del scior Cary, l’è stait sorbid in la biblioteca de l’Università de Yale in del 1967; quell mazz chì el ven ancasì ciamad “quell di Viscont de Modron” per vun di ram cadet de Cà Viscont. L’è stait fait intorna al 1466. Un quaj studios l’ha sugerid che i sibien propri ol mazz de carte pussee vegg intra tucc.

• 
  Un detaj de la carta del quater de or.
• 
  Dama de spade.
• 
  Cavajera de or.
• 
  Fed.
• 
  Speranza.
• 
  Benevolenza.
• 
  Mort.

Brera-Brambilla

Ciamad per ol scior Gioann Brambilla, che el l’haveva comprad a Venezzia in del 1900. A partì del 1971, l’è custodid in de la Pinacoteca de Brera a Milan. A parariss che el saja stait comissionad al Bonifazzi Bemb del Franzesch Sforza medem in del 1463, e el consist in 48 carte.

• 
  Fant de cope.
• 
  Cavall de cope.
• 
  Regina de baston.

Per savénn pussee

• Giordano Berti. Storia dei tarocchi: verità e leggende sulle carte più misteriose del mondo, Mondadori, 2007, ISBN 88-04-56596-9, ISBN 978-88-04-56596-3, 241 pages.
• Michael Dumet. The Visconti-Sforza Tarot Cards, G. Braziller, 1986, ISBN 0-8076-1141-7, ISBN 978-0-8076-1141-8, 141 pages.

Ligam de fœura

• I taroch di Viscont in la conlezzion digital in sul sit de l’ Università de Yale.