Matee Capitel Cinch

De Wikipedia
Jump to navigation Jump to search
Lombard Occidental Quel articul chì l'è scrivüü in Lumbard ucidental, cun l'urtugrafia ünificada.


Matee[Modifega | mudìfica 'l sorgènt]

La Parola del nost Signur ciapada inscí cuma l'è de'l Növ Testament e vultada adess in del nost parlà Insübregh del didincö.

Capitel Cinch[Modifega | mudìfica 'l sorgènt]

Quand che 'l Gesü l'ha vedüü la bolgia de gent, l'è andaa sü in scima a un munt e 'l s'è setaa sgiò; pö i so dissepuj hin gnüü sü anca lur. 2 E alura 'l Crist l'ha dervii la boca e l'ha tacaa sü a insegnà e l'ha dii: 3 Beaa hinn quij che hinn puaret in del spiret; perchè 'l Regn di Cej 'l ghe partucaraa a lur.

4 Beaa hinn quij che gh'hann 'l magun; perchè saràn cunfurtaa.

5 Beaa hinn quij che hinn debuj; perchè la tera la partucaraa a lur.

6 Beaa hinn quij che gh'hann fam e sed de Giüstizia; perchè saràn sagiaa.

7 Beaa hinn quij che gh'hann misericordia; perchè tuaràn misericordia.

8 Beaa hinn quij che hinn pür de cör; perchè saràn bun de vardà 'l Signur.

9 Beaa hinn quij che serchen la pas; perchè saràn ciamaa bagaj del Signur.

10 Beaa hinn quij che vegnen pestaa suta i pee perchè gh'hann vöja de Giüstizia; perchè 'l Regn di Cej 'l ghe partucaraa a lur.

11 Beaa sii violter, quand che la gent la ve vusa 'dree, la ve ciapa a pesciad in del dedree, e la dis di gran busij in sü de violter, dumà perchè violter sii dree a parlà ben de mi. 12 Sii bej cuntent e ridii tücc felis perchè in del Regn di Cej sarii ben cumpensaa. Anca i prufeta, ch' hinn vegnüü inanz de violter, hinn staa maltrataa a l'istessa manera.

13 Violter, cara i mee bagaj, sii la saa de la tera. Ma se la saa l'ha perdüü 'l so saur, la dröum de fà cusè alura? L'è pü bona de fagh negot, föra che de vess trada a muntun e 'gnì pestada suta i pee. 14 Violter sii la lüs del mund. Una citaa che l'è sü in scima a un munt, la po minga vess scundüda. 15 A l'istessa manera quand che vün 'l pizza sü na scira, la met minga suta un baslòt ma bel in vista in sü un candelaber; inscí che la dia lüs a tücc quij che hinn in de la cà. 16 E alura, cara i mee fiö, fee inscí che la vosta lüs la sberlüscia denanz a tücc inscí che la gent la veda i vost bun över e che la loda 'l Signur che l'è in Cel.

17 Pensee minga, violter, che mi a sia 'gnüü chinscí a trà stram in sü la legg u in sü i prufeta; mi a sunt minga 'gnüü chí a trà giò ma a fà sü quel ch' i prufeta hann dii. 18 Perchè a div la veridaa, ma quela vera, nè, mi a gh'huu de div: finn a la fin del mund, finn al dí che'l süced tüt quel che'l gh'ha de süced, gnanch una letera, e gnanch un puntín in sü na i, de la legg poden vess ignuraa. 19 Quij che sgaren, anch in d'un tuchelin ben piscinin, in vöna de chi legg chi e ghe insegnen a la gent a fà cumpagn de lur, saràn ciamaa i manch impurtant in del Regn di Cej; ma quij che tegnen ben a ment chi legg chi e ghe insegnen aj olter a fà a l'ìstessa manera, saràn ciamaa i püssee impurtant in del Regn di Cej. 20 Perchè mi a ve'l disi bel ciar e spetasciaa: per quij che fan gnanca cünt de vess mej di scriban e di farisee, 'l saraa ben düra met pè in del Regn di Cej, ve'l disi mi.

21 Violter ii sentüü ben cuma in di secuj passaa a la gent 'l gh'è staa dii: "Cupee no![1]"; che quij che copen saràn menaa denanz del Giüdes. 22 Mi però a ve disi: vün che'l s'inrabiss cunt el so fradel senza na resun, el saraa menaa anca lü denanz del Giüdes! E vün che al so fradel 'l ghe dis: "bun de negot!" el saraa ancamó püssee in pressa menaa denanz del Giüdes; ma, ociu, vün ch' al so fradel 'l ghe dis "Stüped!": el gh'ha giamò un pè in del fögh de l'infern! 23 Per chela resun chi mi a ve disi: se vün l'è lí denanz a l'altar cunt un cadó in man e 'l ghe vegn in ment de vegh una quaj briga cunt un fradel, 24 inanz de ufrighel al signur chel cadó chi, che 'l vaga a fà la pas cunt el so fradel! 25 Fee la pas cunt i vost nemis quand che sii anmò in sü la via, inanz che vün de lur el ve mena denanz del Giüdes, e 'l Giüdes el ve mena in presun! 26 Mi ve'l disi bel e ciar: de presun en vegnii pü föra, ve'l disi mi, finn al dí ch'ii pagaa finn a l'ültem centesem!

27 Violter ii sentüü ben cuma l'è staa dii: "Devurzeves minga![2]" 28 Mi, però, a ve disi: quand che vün 'l ved una tusa e 'l ghe sbaüscia 'dree cunt una gran brama, vün che 'l fà inscí a l'è giamò devurziaa in del so cör! E se l'ögg che gh'ii a drissa 'l ve mena in de la brüsa, büteveles via, perchè l'è mej perd un toch del vost corp che 'gnì traa in del fögh de l'infern! 30 Quand che la man drissa la ve mena in de la brüsa, tajevelesa via , perchè l'è mej perd un toch del vost corp che 'gnì traa in del fögh de l'infern! 31 A l'è staa anca dii: "Quand che vün 'l se separa de la miee, el gh'ha de dagh un palpee de devorzi.[3]" 32 Mi però a ve disi: vün che'l se lassa cunt la miee, föra che in cas de adülteri, el fá inscí che la sia un adültera minga dumà lee, ma quij che la töen in miee, cumpagn de lee!

Violter ii sentüü ben cuma l'è staa dii: "Giüree minga 'l fols e sii unest cunt el Signur![4]" 34 Però mi a ve disi, che l'è mej giürà no e basta: ne in sül Cel, perchè l'è la cadrega durada del Signur; 35 ne in sü la tera, perchè l'è 'l pogiapee del medèm; e gnanca in sü Gerüsalem perche l'è la citaa del gran re. 36 E gnanca in sül vost cuu te gh'ii de giürà perchè violter sii gnanca bun de fa sí ch' un cavèl el sia bianch u 'l sia negher. 37 Però quand che sii dree a parlà, me racumandi: sí l'è sí, e no l'è no; sedenò, tüt el rest l'è brüta roba.

38 Violter ii sentüü ben cuma l'è staa dii: "Un dint per un dint e un ögg per un ögg.[5]" 39 Però mi a ve disi che al maa 'l se da minga resposta, ma, al cuntrari: se vün el ve da un s'giafun in sü la ganassa drissa, ufriigh anca quela manscina. 40 E se vün 'l ve mena denanz el giüdes in tribünal perchè 'l vör la vosta camisa, deegh anca la gípa. 41 E se vün 'l ve fa scarpinà un chilometer, veegh adree per düü. 42 Se vün 'l ve ciama un quejcoss, deeghel pür, e vultee no la s'cena a quij che ve ciamen una man.

43 Violter ii sentüü ben cuma l'è staa dii: "Vuriigh ben ai vost amis[6]" e udiee i vost nemis. 44 Però mi a ve disi: vuriigh ben ai vost nemis e preghee per quij che ve ciapen a pesciad in del dedree, 45 inscí che sarii ciamaa i bagaj del vost Pader che l'è in Cel. Perchè 'l Signur, el su 'l fa 'gnì sü e per i bun, e per i cativ, e 'l lassa che la piöa la vegna sgiò e in sü i bravomen, e in sü i baloss. 46 Perchè see vü ghe vurii ben a quij che ghe vören ben a violter, che recumpensa pensee mai de tö? Fann minga inscí giamò tücc, parfinn i travèt? 47 E se vü sii bun cunt i vost fradej, a l'è minga pö una gran roba: fann minga inscí parfinn i ghisa? 48 Per chela resun chi, violter gh'ii de vess parfecc, propi cumpagn del vost Pader che l'è in Cel.

  1. Musè 20,13; 21,12
  2. Musè 20,14
  3. Musè 24,1
  4. Musè 19,12; 30,3
  5. Musè 21,24
  6. Musè 19,18

Navigaziun[Modifega | mudìfica 'l sorgènt]