Luigi Guanella

De Wikipedia
Lumbard ucidental Quest articol chì l'è scrivuu in lombard, grafia milanesa.
On madonnin del Luigi Guanella.

El Luigi Guanella (Fracisc, 19 de dicember del 1842 - Comm, 24 de otober del 1915) l'è staa on prevet italian.
L'ha fondaa i congregazion catolegh di Serv de la Carità e di Tosann de Santa Maria de la Providenza. L'è veneraa 'me sant de la Gesa catolega.

La vita[Modifega | modifica 'l sorgent]

Nassuu a Fracisc, frazion de Cadolscin, l'era el fioeu del scior Lorenzo e de la Marina Bianchi. Quei lor gh'aveven avuu tredes fioeu, e lu l'era el fradell quell de noeuv.
L'ha studiaa a Comm e poeu in di seminari de la diocesi: l'è deventaa prevet el 26 de magg del 1866 per man del vescov de Foggia, el Bernardino Frascolla.
L'ha faa el prevost prima a Prost e a Savogn (frazion de Piur), in tra el 1867 e 'l 1875. In quell period l'ha cognossuu el Don Bosch e la soa oeuvera, el Cottolengo, e l'è restaa con lu per trii agn. Poeu l'è staa mandaa a fà el prevost a Traona (1878-1881), on quai mesett a Olmo (frazion de San Jacom) e infina a Pianell (1881-1890).
A Pianell l'ha ciappaa su l'ospizzi fondaa del sò predecessor, el don Carlo Coppini, che adess l'era in man a ona quai monega: in tra de lor a gh'era la Marcellina Bosatta e la soa sorella Chiara. El Guanella l'ha reorganizaa la comunità e 'l gh'ha daa on impuls noeuv: la comunità la s'è ciamada Tosann de Santa Maria de la Divina Providenza, che in del 1886 l'è stada reunida in la Cà de la Divina Providenza. Quella chì la s'è desviluppada a la svelta, e al ramm di donn el s'è giontaa anca quell di omen, che l'ha ciappaa el nomm de Serv de la Carità; inizziativa sostegnuda anca de l'Andrea Carlo Ferrari. L'oeuvera la s'è spantegada e l'è rivada in di provincc de Milan, Pavia, Sondri, Rovigh, Roma, Cosenza, ma anca foeura de l'Italia (Svizzera e Statt Unii).

L'è mort dopo vess staa colpii de paralisi e vess staa visitaa o benesii del don Luigi Orione e del papa Benedett XV. L'è soteraa a Comm.
In del 1964 l'è staa proclamaa beatt del Papa Paol VI, e sant in del 2012 per man del Papa Benedett XVI. La soa festa l'è 'l 24 de otober.