Lesg in sul status special del Donbass
|
Quest articol chì l'è scrivud in lombard, con la Noeuva Ortografia Lombarda |
La Lesg in sul status special del Donbass (pussee completament Lesg sora el regim special d'autogoverno per di determinad distret di Region de Donec'k e Luhans'k, in ucrain Про особливий порядок місцевого самоврядування в окремих районах Донецької та Луганської областей) a l'è una lesg aprovada de la Rada Suprema de l'Ucraina in del 2014, 'me conseguenza di acord de Minsk, inscì de regolà el status di zone separatista del Donbass. In principi, el status special el saria durad per trè agn, ma ogni ann a l'è prorogad, del 2017: a bon cunt, però, i territori indova che la se aplicaria incoeu a inn no controllad del governo de Kyiv ma di republeghe popolar separatista de Doneck e Lugansk.
La lesg la preved un'amnistia per i separatista, el liber doperà e desvilup de la lengua russa in la zona, el nomenà de vari ofizziai de governa de part di ministrazzion locai e no del governo central, el fà su de 'na milizzia local sota ai sindegh, un sostegn economegh pussee a la zona e di raport pussee boni in tra la Russia e l'Ucraina.
Firmada del Porošenko, l'ha vist di reazzion messedade in Patria, indova che inn stade acusade de legimità i separatista e de legalizà i milizzie armade locai, che inn inveci fina adess considerade 'me grup terroristegh. Quand che in del 2015 el Porošenko l'ha insubid una modifega a la Costituzzion che la recognosseva 'n status particolar al Donbass vari partid nazzionalista, compagn de Svoboda, del Partid radical de Oleh Ljaško e l'UKROV s'inn s'cerad contra e hann ciamad la sgent in piazza, indova che gh'è stad pussee de cent ferid. Inveci, i republeghe popolar, hann did che lor se ritegnen independent e voeuren minga una lianza con l'Ucraina.