Giudaism messianegh

Quest articol chì l'è scrivud in lombard, con la Noeuva Ortografia Lombarda

El giudaism messianegh a l'è un moviment vegnud foeura de l'evangelicism, che ghe met dent di element de la tradizzion, de la coltura e de la religion ebraica. I sgiudee messianegh pensen che 'l Gesù a l'è el Messia profetizad in la Tanakh, che gh'è de havégh fed in lu per vesser salvad, e che anca el Noeuv Testament l'è part di scriture, ma comunque - in bas a la confession che ghe vann adree - respeten vari toch de la lesg ebraica.

Vegnud foeura in tra i agn 1960 e 1970 del moviment giudee-cristian, vun di so proponent pussee grand a l'è stad el pastor evangelich Moishe Rosen, fondator de la mission Sgiudee per el Gesù.

I sgiudee messianegh veden la soa fed 'me una forma de giudaism, che ghe va adree ai principi messianegh che inn recognossud de la pupart di sgiudee, ma la pupart di sgiudee la ved minga inscì e la considera una forma de cristianesim: l'è anca la posizzion del governo israelian, che ghe fa minga fà l'Aliyah in bas a la Lesg del retorn ai sgiuee messianegh e i recognoss domà 'me confession cristiana. Tancc sgiudee, comunque, veden propi mal el recognosser el Gesù 'me Messia e pensen che la Trinità la sibia idolatria o comunque shituf. La pupart di cristian evangelich, soratut in di Stat Unid, i ved 'me di cristian.

El so stà adree ai regole de la lesg ebraica el varia de moviment a moviment: gh'è quei che rispeten el kashrut in manera integral e prateghen la circoncision e pensen che l'è pecad fàll no, tant 'me che gh'è quei che se limiten a schivà el mangià che colturament ghe pias no ai sgiudee, compagn del porscell e anca quei che pensen che la gh'ha de vesser domà una scerna personal.

Prateghen la soa fed in di sinagoghe ma con di rit pussee vesin a quei cristian evangelich e prateghen anca el batesim, in la forma del Mikveh.

Riferiment

Sit in sul giudaism messianegh

Alter proget

Wikimedia Commons el gh'ha dent imagin o alter archivi su Giudaism messianegh

Vos corelade